رفح پرحالیہ حملے کے بعد پالیسی نہیں بدلی ،واقعے کی تحقیقات پر نظر ہے:امریکہ

امریکی محکمہ خارجہ نے کہا ہے کہ امریکہ نے واقعے کی اطلاع ملتے ہی رفح میں حملے کے بارے میں گہری تشویش کا اظہار کرنے کے لیے اسرائیلی حکومت سے رابطہ کیا ہے۔ واشنگٹن اسرائیلی تحقیقات کے نتائج پر گہری نظر رکھے ہوئے ہے۔

امریکی محکمہ خارجہ کے ترجمان میتھیو ملر نے کہا کہ واشنگٹن اسرائیل پر بین الاقوامی انسانی قانون کی مکمل پابندی کرنے، شہریوں پر اس کی کارروائیوں کے اثرات کو محدود کرنے اور انسانی امداد کے بہاؤ کو بڑھانے کی ضرورت پر زور دیتا رہے گا۔

دوسری جانب وائٹ ہاؤس کے ترجمان جان کربی نے کہا کہ رفح پر اسرائیل کا کوئی بھی بڑا زمینی حملہ بلا جواز ہے۔

انہوں نے کہا کہ امریکی صدر جو بائیڈن جنوبی غزہ کی پٹی کے شہر رفح میں ہونے والی ہلاکتوں پر آنکھیں بند نہیں کر رہے ہیں لیکن وہ ایک کیمپ پر اسرائیلی حملے میں ہلاکتوں کے بعد اپنی پالیسی تبدیل کرنے کا ارادہ نہیں رکھتے۔

جلی ہوئی لاشوں کی تعداد کے بارے میں ایک سوال کے جواب میں جان کربی نے صحافیوں کوبتایا کہ یہ ایسی چیز نہیں ہے جس پر ہم نے آنکھیں بند کر رکھی ہیں۔رفح میں بے گھر لوگوں کی خیمہ بستی پر اسرائیلی بمباری کے بعد امریکہ کی پالیسی میں کوئی تبدیلی نہیں آئی ہے۔