پنجاب اور خیبر پختونخوا میں بارش کی پیشگوئی

محکمہ موسمیات نے پنجاب اور خیبرپختونخوا چند علاقوں میں بارش کی پیشگوئی کی ہے۔

محکمہ موسمیات کےمطابق خطہ پوٹھوہار،بالائی پنجاب اورخیبرپختونخوا میں بارش کا امکان ہے،اس کے علاوہ اسلام آباد اور گر دو نواح میں موسم ابرآلود رہنے کے ساتھ بارش کا امکان ہے۔جنوبی اضلاع میں شدید گرمی کی لہرکا سلسلہ جاری ہے۔

گلگت بلتستان اورکشمیر میں مطلع ابرآلود رہنے کے علاوہ بارش کا امکان ہے، بالائی خیبر پختونخوا میں بھی گرج چمک کے ساتھ بارش ہوسکتی ہے، راولپنڈی، مری،گلیات، اٹک،چکوال، جہلم، گجرات،گوجرانوالہ میں بارش متوقع ہے۔

محکمہ موسمیات نے ڈی جی خان،بہاولپور،راجن پور،مظفر گڑھ اور ملتان میں بھی بارش کا امکان ظاہرکیا ہے،شام میں سندھ کے بالائی اور وسطی اضلاع میں جھکڑ چلنے کا امکان ہے،سندھ کے ساحلی علاقوں میں موسم گرم اورمرطوب رہے گا۔