علی امین گنڈا پور نے گورنر کے پی کو کھری کھری سنا دی

وزیراعلیٰ خیبرپختونخوا علی امین گنڈاپور کاکہنا ہے کہ گورنر کے پی کیا حیثیت ہے ؟ وہ اپنے گورنر ہاؤس میں رہیں ورنہ کھانا اور گاڑیاں بند کردیں گے۔

پشاور میں بی آر ٹی کے افتتاح کے موقع پر گفتگو کرتے ہوئے وزیراعلیٰ علی امین گنڈاپور نے کہا کہ احتجاج کے حوالے سے ہماری تیاری مکمل ہے ، یہ ہمارے صوبے کے حق پر کٹوتی نہیں کرسکتے۔

وزیراعلیٰ کے پی کا مزید کہنا تھا کہ گورنر کی حیثیت یہ ہے کہ یہ ہم تینوں بھائیوں سے ہارا ہے۔ انہیں سیاسی شہید نہیں بننے دیں گے سیاسی مردار کریں گے۔

 وفاقی بجٹ سے پختونخوا کے منصوبے ختم کرنا کم ظرفی ہے۔ ہم اپنا حق لینا جانتے ہیں احتجاج کے لیے تیار ہیں۔

علی امین نے کہا کہ صوبے کے منصوبوں پر وفاق کو کٹوتی نہیں کرنے دیں گے، ان سے حکومت نہیں چل رہی،بجٹ پیش نہیں کر پا رہے ہیں، ہمارے حق پر محاذ آرائی تو یہ لوگ کررہے ہیں۔

انہوں نے کہا کہ نا اہل حکمرانوں سے ملک نہیں چل رہا۔ یہ ہمارے سروں  پر سوار ہیں اور ہم سر سے اتارنا جانتے ہیں۔ ہم محاذ آرائی نہیں کر رہے بلکہ اپنا حق مانگ رہے ہیں۔ بلاول بھٹو کو کس بنیاد پر آکسفورڈ یونیورسٹی میں داخلہ ملا تھا قوم کو بتائیں۔

وزیر اعلیٰ کے پی کا کہنا تھا کہ صوبہ چلانا ہمارے لیے کوئی مسئلہ نہیں ہے، بجلی ہمارے دور میں 16روپے یونٹ تھی آج 64 روپے یونٹ ہے، بجلی کے بلوں کی مد میں لیا جانے والا پیسہ کہاں جارہا ہے؟ ، عوام کو اچھی ٹرانسپورٹ مہیا کریں گے۔

علی امین گنڈاپور نے کہا کہ  سائفر میں کچھ نہیں، ہم نے پہلے کہہ دیا تھا، ہمارے خلاف تمام مقدمات جھوٹے ہیں،حساب لیں گے۔