پیپلز پارٹی اب پاکستان ڈیموکریٹک موومنٹ کا حصہ نہیں ہے : مریم نواز

تفصیلات کے مطابق اسلام آباد ہائی کورٹ میں میڈیا سے گفتگو کرتے ہوئے نائب صدر مریم نواز نے کہا کہ پی ڈی ایم میں کوئی اختلاف نہیں، سب کا ایک ہی نظریہ ہے، اس میں شامل جماعتوں کا وہی موقف ہے جو نواز شریف کا ہے۔ پیپلز پارٹی میرا ہدف نہیں ہے اور ہمارا مقابلہ پیپلز پارٹی سے نہیں اور نہ وہ پی ڈی ایم کا حصہ ہے۔

امریکہ کو پاکستانی اڈے دینے کے معاملے پر انہوں نے کہا کہ میں پاکستان میں امریکہ کو اڈے دینے کی  مخالفت کرتی ہوں ۔ ایک سوال کے جواب میں مریم نواز نے کہا کہ اداروں کو سیاسی انتقام کا نشانہ بنانےکے لیے استعمال کیا جاتا ہے، اس سے متعلق بشیر میمن کا بیان بھی موجود  ہے۔ چیئرمین نیب تو عمران خان ہیں ،ایک کو ہٹا دیں دوسرے کو لگا دیں ، چیئرمین نیب کی طرح عمران خان کا آلہ کار بننے والوں کو بھگتنا پڑے گا ، احتساب آلہ کار بننے والوں کا بھی ہو گا ۔

ان کاکہنا تھا کہ  جسٹس شوکت عزیز صدیقی کو سچ بولنے کی سزا نہ دی جائے۔ شوکت عزیزصدیقی کی گواہی بڑی ہے اس کی آزادانہ تحقیقات کی جائیں ،یہ صرف شوکت عزیز کیس نہیں بلکہ بہت الارمنگ بات ہے،  عدلیہ کو سمجھنا چاہیے ، آج کیس سننے والے وہ جج بھی کٹہرے میں کھڑے ہوں گے ،  عدلیہ کو کچھ ایسا کرنا چاہیے کہ کوئی کسی بھی جج سے غلط فیصلہ نہ لے سکے ۔ مریم نواز کاکہنا تھا کہ جسٹس شوکت عزیز صدیقی اور فائز عیسی کیس کو عدلیہ پر حملہ تصور کیا جانا چاہیے۔انہوں نے  مزید کہاکہ جو بھی ڈیل کی ہے وہ حکومت بچانے کے لیے یا سرنڈر کیا ہے تو پارلیمنٹ میں قوم کو بتایا جائے کہ کیا بلنڈر کیا ہے، قوم کے سامنے آنا  چاہیے کہ اپنی حکومت بچانے کے لیے کیا سودا کر کے آئے  ہیں ۔

مریم نواز کاکہنا تھا  کہ ن لیگ بجٹ بارے مشاورت کر رہی ہے،بجٹ پر کیا حکمت عملی ہو گی شہباز شریف جلد قوم کے سامنے لائیں گے۔ مسلم لیگ ن نے لوڈ شیڈنگ ختم کی تھی لیکن حکومت کی نااہلی عروج پر ہے ، ڈہرکی ٹرین حادثہ حکومتی نااہلی کا بڑا ثبوت ہے۔