پاکستانی عازمین حج کو غیر معیاری کھانا فراہم کرنیوالی 6 کمپنیوں کو جرمانے

پاکستان حج مشن نے مکہ مکرمہ میں کام کرنے والی کیٹرنگ کمپنیوں کو غیر معیاری کھانا فراہم کرنے پر جرمانے عائد کر دیئے۔ان کمپنیوں پر ڈھائی لاکھ سعودی ریال (تقریباً دو کروڑ پاکستانی روپے) کے 17 جرمانے عائد کیے ہیں ۔ان کمپنیوں نے حجاج اکرام کو کھانا فراہم کرنے کا معاہدہ کر رکھا ہے۔

میڈیا رپورٹس کے مطابق پاکستان حج مشن نے رواں سال سرکاری سکیم کے تحت حج ادا کرنے والے 70 ہزار سے زائد عازمین کے کھانے کی ضروریات کو پورا کرنے کے لیے 9کیٹرنگ کمپنیوں کے ساتھ معاہدے کئے گئے ہیں۔

نو مئی سے اب تک 217 پروازوں کے ذریعے 55 ہزار 990 سے زیادہ سعودی عرب پہنچ چکے ہیں۔

سرکاری نیوز ایجنسی نے پاکستان حج مشن کے حکام کے حوالے سے رپورٹ میں کہا کہ زیادہ تر جرمانے معاہدے کے بعض عناصر کی خلاف ورزی کرنے اور سپلائی چین میں بغیر کسی رکاوٹ کے حاجیوں کو بروقت حفظان صحت کے مطابق کھانے کی فراہمی کو یقینی نہ بنانے پر عائد کیے گئے ہیں۔

کیٹررز کی خدمات حاصل کرنے کا عمل گذشتہ سال نومبر میں وفاقی کابینہ کی منظوری کے بعد شروع کیا گیا تھا کہ معیاری کھانا ایک دن کے لیے 35 ریال فی شخص کے حساب سے فراہم کیا جائے گا۔

مشن کے عہدیداروں نے بتایا کہ فوڈ کوآرڈینیٹرز کھانے کی تیاری کے دوران مسلسل نگرانی اور کچن کی 24 گھنٹے نگرانی کر رہے تھے۔