جب تک زندہ ہوں فاٹا پر کوئی ٹیکس نہیں لگاسکتا، علی امین گنڈا پور کا سوات جلسے سے خطاب

سوات : وزیر اعلیٰ خیبر پختونخواہ علی امین گنڈا پور نے سوات میں جلسہ عام سے خطاب کرتے ہوئے کہا کہ بانی پی ٹی آئی ایک نظریے اور سوچ کا نام ہے۔  بانی پی ٹی آئی کی سوچ کو کوئی ختم نہیں کر سکتا۔ جعلی کیسز میں ہمارے لیڈر عمران خان کو سزا دی جا رہی ہے۔وزیر اعلیٰ خیبر پختونخواہ نے بتایا کہ وفاق کا ارادہ ہے کہ خیبر پختونخواہ پر ٹیکس لگائیں گے۔ انہوں نے کہا ہم اپنا حق لینا اور چھیننا بھی جانتے ہیں، ہماری مرضی کے بغیر کوئی ہم پر ٹیکس نہیں لگا سکتا۔ انہوں نے واضح کیا کہ جب تک زندہ ہوں فاٹا پر کوئی ٹیکس نہیں لگاسکتا۔ 
جلسہ عام سے خطاب کرتے ہوئے وزیر اعلیٰ خیبر پختونخواہ کہا کہ جس کے لیے پاکستان ٹوٹا تھا، اسکو بھی پھانسی ہو گئی۔ ہم یہاں شخصیات کے فیصلوں کو نہیں مانتے۔ موجودہ وفاقی حکومت کے پاس عوامی مینڈیٹ اور اخلاقی جرات نہیں ہے۔    
علی امین گنڈا پور کا اپنے اوپر کیے گئے تشدد کے حوالے سے کہنا تھا میں کس سے پوچھوں میرا مجرم کون ہے۔ کیا میرا مجرم آصف زرداری، مریم نواز ، اور آئی جی پنجاب ہے؟
پی ٹی آئی لیڈر علی امین نے شکوہ کیا کہ ہمارے لوگوں پر جبر کر کے ہمارے ہی خلاف استعمال کیا گیا۔  انہوں نے مزید کہا کہ پختون کے خون پر مزید سمجھوتہ نہیں کریں گے۔ 
وزیر اعلیٰ خیبر پختونخواہ نے بتایا کہ انہیں خبریں مل رہی ہیں جو غیر قانونی طریقے سے جنگل کاٹ رہا ہے۔ انہوں نے مزید کہا کہ رشوت دینے والوں کو نہیں چھوڑیں گے، بلکہ ان کے ہاتھ توڑیں گے۔
پی ٹی آئی لیڈر علی امین نے کہا کہ میں اپنے صوبے کے حق کے لیے نکلوں گا۔  انتظار میں ہیں کہ کب بانی پی ٹی آئی ہمیں نکلنے کا کہیں گے۔ 
وزیر اعلیٰ خیبر پختونخواہ نے عوام کو مخاطب کر کے کہا کہ عوامی حکومت میں متحد رہ کر مل کر کام کرنا ہے۔ انہوں نے کہا کہ ہم صوبے کا حق لے کر عوام پر لگائیں گے۔