وزیراعظم شہباز شریف نے چین میں بھی ملکی ترقی کی راہ ہموار کر دی، مریم نواز

وزیراعلیٰ پنجاب مریم نواز نے کہا کہ وزیراعظم شہباز شریف نے چین میں بھی بہترین سفارت کاری سے ملکی ترقی خوشحالی کی راہ ہموار کر دی۔

مریم نواز نے وزیر اعظم شہباز شریف کی ملکی ترقی و خوشحالی کی کاوشوں کو خراج تحسین پیش کیااور چین کے کامیاب دورے پر مبارکباد دی ہے۔

انہوں نے کہا کہ چین کے سرمایہ کاروں کی شراکت داری پر آمادگی معاشی ترقی کے راہ کھولے گی، سی پیک پراجیکٹس کی تکمیل میں تیزی آئے گی، پاک چین تعلقات چٹان کی طرح مضبوط اور سربلند ہیں۔

مریم نواز کا کہنا تھا کہ پاکستان اور چین کا علاقائی امن واستحکام اور ترقی و خوشحالی کیلئے ملکر کام کرنے کا عزم قابل تحسین ہے۔

وزیراعلیٰ پنجاب نے کہا ہے کہ نواز شریف کی قیادت میں مسلم لیگ ن کی حکومت عوام کی معاشی ترقی کے لیے دن رات کام کر رہی ہے، نواز شریف کی رہنمائی میں معیشت استحکام کی جانب گامزن ہے۔

انہوں نے مزید کہاکہ ملک اچھے معاشی حالات کی جانب رواں دواں ہے، آٹا، روٹی اور دیگر ضروری اشیاء کے نرخ میں کمی کا رجحان خوش آئند ہے۔