پاکستان کوہلکا نہیں لیا جا سکتا، روہت شرما

بھارتی کرکٹ ٹیم کے کپتان روہت شرما نے کہا ہے کہ پاکستان کو ہلکا نہیں لیا جاسکتا۔

بھارتی کرکٹ ٹیم کے کپتان روہت شرما نے گزشتہ روز پریکٹس سیشن کے بعد صحافیوں سے بات کرتے ہوئے کہا کہ پاکستان کو ہلکا نہیں لیا جاسکتا، یہی ٹیم گزشتہ ورلڈکپ میں زمبابوے سے ہار کر بھی فائنل کھیل گئی، یقین ہے پاکستان نے اپنی غلطیوں پر کام کیا ہوگا۔

انہوں نے کہا کہ ہم پاکستان کو بار بار شکست دینا چاہتے ہیں لیکن اس کے لیے ہمیں اچھی کرکٹ کھیلنا ہوگی کیوں کہ میچ والے دن جو بھی اچھا کھیلے گا، نتیجہ اسی کے حق میں ہوگا۔

روہت شرما نے کہا کہ ٹی20 فارمیٹ میں کچھ بھی ہوسکتا ہے اور ایک میچ کے نتیجے پر آپ حریف کی طاقت کا اندازہ نہیں لگاسکتے، پاکستانی ٹیم کم بیک کی صلاحیت رکھتی ہے، یقین ہے پاکستان نے اپنی غلطیوں پر کام کیا ہوگا۔

انہوں نے کہا کہ ٹی20 کرکٹ میں ایک اوور پورا گیم تبدیل کردیتا ہے، لہذا کامیابی کے لیے ہمیں پورے میچ کے بجائے ہر اوور اور ہر گیند پر فوکس کرنا ہوگا، مجھے امید ہے کہ ہم مثبت کرکٹ کھیلیں گے اور نتائج ہمارے حق میں ہوں گے۔

ویرات کوہلی سے متعلق بات کرتے ہوئے بھارتی ٹیم کے کپتان نے کہا کہ اس میں کوئی شک نہیں ویرات بڑے میچ کا کھلاڑی ہے لیکن ہم کسی بھی ایک یا دو کھلاڑیوں پر انحصار نہیں کرتے، کامیابی کے لیے ہر کھلاڑی کو اپنا کردار ادا کرنا ہوگا۔

یاد رہے کہ پاکستان اور بھارت آج مدمقابل ہوں گے، میچ پاکستانی وقت کے مطابق شام ساڑھے 7 بجے شروع ہوگا۔