خیبرپختونخوا میں انسداد پولیو ٹیموں پر 15 حملوں میں 13 پولیس اہلکار شہید

محکمہ انسداد دہشت گردی (سی ٹی ڈی) کی رپورٹ کے مطابق رواں سال خیبرپختونخوا میں انسداد پولیو ٹیموں پر 15 حملوں میں 13 پولیس اہلکار شہید ہوئے۔

سی ٹی ڈی نے خیبر پختونخوا میں پولیو ٹیموں پر حملوں کی رپورٹ جاری کر دی، جس میں بتایا گیا ہے کہ رواں سال پولیس ٹیموں پر 15 حملے ہوئے، ان 15 حملوں میں پولیو مہم کی سیکیورٹی پر تعینات 13 پولیس اہلکار شہید اور 36 زخمی ہوئے۔

سی ٹی ڈی کی رپورٹ کے مطابق رواں سال بنوں میں 4، باجوڑ اور ٹانک میں پولیو ٹیموں پر 3، 3 حملے ہوئے جبکہ خیبر، لکی مروت، مردان، شمالی اور جنوبی وزیرستان میں پولیو ٹیموں پر ایک ایک حملہ رپورٹ ہوا۔

رپورٹ میں مزید بتایا گیا کہ باجوڑ میں حملوں سے 9 پولیس اہلکار شہید جبکہ 30 زخمی ہوئے، بنوں میں پولیو ڈیوٹی پر تعینات 2 اہلکار شہید جبکہ 3 زخمی ہوئے، اسی طرح جنوبی وزیرستان اور ٹانک میں بھی ایک ایک اہلکار شہید ہوا۔

رپورٹ کے مطابق بنوں، خیبر اور لکی مروت میں پولیو ٹیموں پر حملے میں ایک ایک اہلکار زخمی ہوا۔

محکمہ انسداد دہشت گردی خیبرپختوںخوا کے مطابق انسداد پولیو ٹیموں پر حملوں میں دو شدت پسند تنظیموں کی نشاندہی ہوئی ہے۔