پنجاب حکومت نے ہتک عزت قانون کا گزٹ نوٹیفکیشن جاری کر دیا

پنجاب حکومت نے ہتک  عزت قانون کا گزٹ نوٹیفکیشن جاری کر دیا۔

تفصیلات کے مطابق گزٹ نوٹیفکیشن کے بعد پنجاب میں ہتک عزت بل کا فوری نفاذ ہو جائے گا۔ہتک عزت قانون کے تحت ٹرائل سے قبل 30 لاکھ روپے تک ہرجانے کا نوٹس بھجوایا جا سکے گا۔

واضح رہے کہ گزشتہ دنوں صحافتی تنظیموں کے تحفظات اور اپوزیشن کے احتجاج کے باوجود پنجاب اسمبلی میں ہتکِ عزت بل 2024ء منظور کر لیا گیا تھا۔

یاد رہے کہ 2 روز قبل پنجاب اسمبلی سے منظور ہونے والا ہتکِ عزت بل قانون بن گیا۔قائم مقام گورنر ملک محمد احمد خان نے بل پر دستخط کیے تھے۔

صوبائی اسمبلی میں پاس ہونے والے ہتک عزت بل 2024 کے تحت ٹی وی چینلز اور اخبارات کے علاوہ فیس بک، ٹک ٹاک، ایکس، یوٹیوب اور انسٹاگرام جیسے سوشل میڈیا پلیٹ فارمز پر کسی کے خلاف جھوٹی خبریں نشر کرنے یا کردار کشی کرنے پر بھی 30 لاکھ روپے جرمانہ ہوگا۔

مقدمات کی سماعت کے لیے ٹربیونلز قائم کیے جائیں گے اور 180 دنوں کے اندر فیصلے کے پابند ہوں گے۔

ہائی کورٹ کے بنچ آئینی عہدوں پر تعینات افراد کے مقدمات کی سماعت کریں گے۔