ایران میں زلزلے کے جھٹکے، 4 افراد جاں بحق، درجنوں زخمی، مکانات تباہ

ایران کے صوبے خراسان میں زلزلے کے نتیجے میں 4 افراد جاں بحق اور 120 زخمی ہو گئے۔

میڈیا رپورٹس کے مطابق ایران کے صوبے خراسان میں زلزلے سے کاشمر شہر میں درجنوں گھر بھی تباہ ہو گئے، زلزلے کے جھٹکے افغانستان میں بھی محسوس کئے گئے ہیں۔

ریکٹر اسکیل پر زلزلے کی شدت 4.9 ریکارڈ کی گئی۔ زلزلے کا مرکز ہوزستان کا شہر مشراگہ اور زیرِ زمین گہرائی 16 کلومیٹر تھی۔

مقامی حکام نے بتایا کہ کم از کم 4 افراد جاں بحق جبکہ 120 سے زائد افراد زخمی ہیں ، زخمیوں کو ہسپتال منتقل کر دیا گیا ،زلزلے کے نتیجے میں بجلی ، پانی اور گیس کی فراہمی کا سلسلہ منقطع ہو گیا۔

بے گھر ہونے والے ہزاروں شہریوں نے ہفتے اور اتوار کی درمیانی شب خیموں میں گزاری۔ زلزلے کے درجنوں آفٹر شاکس کے بعد لوگوں کی ایک بڑی تعداد سڑکوں اور پارکوں میں سوئی۔

غیر ملکی میڈیا رپورٹ کے مطابق ایران میں ہر سال اوسطاً 10,000 زلزلے آتے ہیں، اقوام متحدہ کے مطابق یہ ملک اب بھی 2003 کے سانحے سے دوچار ہے جب 6.6 شدت کے زلزلے نے تاریخی شہر بام کو تباہ کر دیا تھا، جس میں ہزاروں افراد کی جانیں گئیں۔

گزشتہ سال مغربی آذربائیجان صوبے کے شہر خوئے میں 5.9 شدت کے زلزلے کے بعد کم از کم تین افراد ہلاک اور 800 سے زائد زخمی ہوئے۔

ایرانی  خبررساں ایجنسی کا کہنا ہے کہ جنوری میں آنے والے زلزلے کے وقت 70 دیہات کو نقصان پہنچا تھا۔