بجٹ پر بحث کیلئے سینیٹ، قومی اسمبلی کے اجلاس آج طلب

آئندہ مالی سال 25-2024 کے وفاقی بجٹ پر بحث کے لیے ایوان بالا سینیٹ اور ایوان زیریں قومی اسمبلی کے اجلاس آج شام 5 بجے طلب کرلیے گئے۔

رپورٹ کے مطابق عید کی چھٹیوں کے وقفہ کے بعد آج قومی اسمبلی اور سینیٹ کے اجلاس ہوں گے، اپوزیشن لیڈر عمر ایوب قومی اسمبلی میں بجٹ پر بحث کا آغاز کریں گے۔

قومی اسمبلی میں بجٹ پر بحث ایک ہفتے تک جاری رہے گی جب کہ سینیٹ کا اجلاس بھی آج دوبارہ شروع ہو گا۔

اپوزیشن لیڈر عمر ایوب بجٹ پر بحث کا آغاز کریں گے اور حکومت کی معاشی پالیسیوں اور ٹیکسوں کے نظام پر تنقید کریں گے، اپوزیشن نے بجٹ منظوری کے دوران احتجاج اور ہنگامہ آرائی جاری رکھنے کا فیصلہ کر لیا۔

ہفتہ اور اتوار کو بھی اجلاس جاری رکھنے کی تجویز دی گئی، حکومت 29 جون کو قومی اسمبلی سے بجٹ کی منظوری حاصل کرے گی۔

حکومتی ارکان کو بجٹ اجلاس میں حاضری یقینی بنانے کی ہدایت کردی گئی، ارکان کو بجٹ منظوری تک حلقوں میں بھی نہ جانے کی ہدایت کی گئی ہے۔

سینیٹ میں اپوزیشن لیڈر شبلی فراز بجٹ پر بحث کر چکے ہیں جب کہ دیگر پارلیمانی جماعتوں کے لیڈرز بجٹ پر بحث جاری رکھیں گے۔