امداد کے لئے جمع ہونےوالے فلسطینیوں پر اسرائیلی بمباری، 20 شہید

رفح کے علاقے میں امداد کے حصول کے لیے جمع ہونے والوں پر بمباری کے نتیجے میں مزید 9 افراد شہید ہوگئے۔غزہ کے مکینوں کے خلاف اسرائیلی فوج کی دہشت گردی جاری ہے۔

اسرائیلی فوج کی ظالمانہ کارروائیوں میں 30 افراد زخمی بھی ہوئے۔ دوسری طرف خان یونس میں یورپی ہسپتال پر اسرائیلی فوج کے حملے میں 11 فلسطینی شہید اور 25 شدید زخمی ہوگئے۔

اسرائیلی فوج کی ظالمانہ کارروائی میں 24 گھنٹوں کے دوران 24 شہادتوں کی اطلاعات ملی ہیں۔ فلسطین کے شہدا کی مجموعی تعداد 37 ہزار 400 ہوگئی ہے۔

یاد رہے کہ گزشتہ روز اسرائیلی فورسز نے غزہ میں نصیرت پناہ گزین کیمپ میں حملہ کرکے 12 فلسطینیوں  کو شہید کردیا۔

غیر ملکی میڈیا رپورٹ کے مطابق اسرائیلی فورسز نے نصیرات پناہ گزین کیمپ میں المدون خاندان سے تعلق رکھنے والے ایک گھر پر بمباری کی، حملے کے نتیجے میں 5 فلسطینی شہید اور متعدد زخمی ہو گئے۔

دوسری جانب لبنان سے حزب اللّٰہ اور اسرائیلی فوج کی جھڑپوں میں اضافہ ہوگیا، اسرائیلی فوج نے حزب اللّٰہ سے تنازع وسیع ہونے کا اشارہ دے دیا۔