آرمینیا نے بھی فلسطین کو آزاد ریاست تسلیم کر لیا

3 یورپی ممالک اسپین، سلووینیا اور آئرلینڈ کے بعد آرمینیا نے بھی یکم جون سے فلسطین کو آزاد ریاست تسلیم کرنے کا اعلان کردیا ہے۔

آرمینیا کی وزارت خارجہ نے ایک بیان میں کہا کہ غزہ کی تباہ کن انسانی صورتحال بین الاقوامی سیاسی ایجنڈے کے اہم مسائل میں سے ایک ہے اور اس کے فوری حل کی ضرورت ہے۔

بیان میں مزید کہا گیا ہے کہ جمہوریہ آرمینیا شہروں کو نشانہ بنانے، شہریوں کے خلاف تشدد کی سختی سے مذمت اور اقوام متحدہ کی جنرل اسمبلی کی قراردادوں کے مطابق غزہ میں فوری جنگ بندی کا مطالبہ کرتا ہے۔

وزارت نے حماس کی جانب سے سویلین افراد کی قید پر بھی افسوس کا اظہار کیا اور کہا کہ وہ ان کی رہائی کے لیے بین الاقوامی برادری کے مطالبات کے ساتھ، فلسطینی اتھارٹی کے ایک سینئر اہلکار حسین الشیخ نے اس اقدام کا خیرمقدم کیا ہے۔

اس بیان کے آخر میں کہا گیا ہے کہ مذکورہ بالا حقائق، بین الاقوامی قوانین، اقوام کی خودمختاری اور پرامن بقائے باہمی سے وابستگی کی تصدیق کرتے ہوئے جمہوریہ آرمینیا فلسطین کی ریاست کو تسلیم کرتا ہے۔

یاد رہے کہ اس سے قبل 3 یورپی ممالک اسپین، سلووینیا اور آئرلینڈ بھی فلسطین کی ریاست کو تسلیم کر چکے ہیں۔