پی ڈی ایم اے نے پنجاب میں مون سون ہواؤں کی پیش گوئی کردی

لاہور: پراونشل ڈیزاسٹر مینجمنٹ اتھارٹی (پی ڈی ایم اے) نے اتوار کو صوبے بھر کی انتظامیہ کو مون سون کی بارشوں کے حوالے سے نوٹیفکیشن جاری کرتے ہوئے کہا ہے کہ اس سال 35 فیصد زیادہ بارشوں کا امکان ہے۔

پی ڈی ایم اے نے یکم جولائی سے پنجاب میں مون سون بارشوں کے آغاز کی پیش گوئی کی ہے۔

پی ڈی ایم اے کے نوٹیفکیشن کے مطابق جولائی کے پہلے ہفتے میں 15 سے 50 ملی میٹر اور دوسرے ہفتے میں 25 سے 35 ملی میٹر بارش کا امکان ہے۔

نوٹیفکیشن میں بتایا گیا ہے کہ جولائی کے تیسرے ہفتے بالائی اور جنوبی پنجاب میں 15 سے 25 ملی میٹر جبکہ چوتھے ہفتے میں 50 سے 70 ملی میٹر بارش ہو سکتی ہے۔ بالائی، وسطی اور جنوبی پنجاب میں گرج چمک کے ساتھ موسلادھار بارش کا امکان ہے۔

پی ڈی ایم اے کے نوٹیفکیشن میں جولائی میں مون سون کی بارشوں کی وجہ سے جنوبی پنجاب میں شہری سیلاب اور پہاڑی طوفان کے خطرے سے خبردار کیا گیا ہے۔

وزیر اعلیٰ مریم نواز کی ہدایات کے مطابق متعلقہ محکموں کو الرٹ کر دیا گیا ہے۔

ڈی جی پی ڈی ایم اے عرفان علی کاٹھیا نے اس بات پر زور دیا کہ ضلعی انتظامیہ مون سون کی بارشوں سے قبل تمام احتیاطی تدابیر کو یقینی بنائے اور ندی نالوں اور نکاسی آب کے نظام کی صفائی کا کام جلد از جلد مکمل کیا جائے۔