چوہدری پرویز الٰہی کا ڈھیل اور ڈیل کا طعنہ دینے والوں کا کرارا جواب

پاکستان تحریک انصاف کے مرکزی صدر چوہدری پرویز الٰہی نے ڈھیل اور ڈیل کا طعنہ دینے والوں کو کرارا جواب دے دیا۔

صدر پی ٹی آئی چوہدری پرویز الٰہی نے کہا کہ ڈیل اور ڈھیل کی باتیں کرنے والے سن لیں پہلے بھی بانی پی ٹی آئی کے ساتھ تھا اور آئندہ بھی رہوں گا۔

ایک تقریب میں شرکت کے موقع پر صدر پاکستان تحریک انصاف (پی ٹی آئی) چوہدری پرویز الٰہی نےمیڈیا سے گفتگو کرتے ہوئے کہا کہ ڈیل اور ڈھیل کی باتیں کرنے والے سن لیں سوا سال جیل میں رہا ہوں جہاں گرنے سے میری پانچ پسلیاں بھی ٹوٹیں، اللہ تعالیٰ نے میری جان کسی مقصد کیلئے بچائی ۔

سوا سال جیل رہا ہوں، کوئی ڈیل نہیں ہوئی، عمران خان کے ساتھ تھا اور رہوں گا، ڈیل اور ڈھیل کی باتیں کرنے والے منہ بند رکھیں۔ چودھری پرویز الہیٰ

pic.twitter.com/hcCgrGvosA

— PTI Politics Update (@PTI_Politics) June 24, 2024

انہوں نے کہا کہ نہ بانی پی ٹی آئی اورنہ میں پیچھے ہٹوں گا، ہم جیل میں ایک دوسرے سے باتیں کرتے رہے ہیں وہ باتیں جلد رنگ لائیں گی، تحریک انصاف جلد اقتدار میں آئے گی۔

چوہدری پرویزالٰہی کا کہنا تھا لوگ اسمبلی توڑنے کی بات کرتے ہیں اس میں بھی اللہ نے خیر رکھی تھی، میری پوزیشن واضع ہے اس میں شک کی کوئی گنجائش نہیں۔

انہوں نے کہا کہ میری نہ کسی سے کوئی ڈیل ہوئی نہ ہی مذاکرات، کیمپ جیل لاہور میں چوہدری شجاعت اور ان کی فیملی ملنے آتے رہے، اگر ڈیل کرنی ہوتی تو میں تب ہی کر لیتا، اس وقت بھی محسن نقوی خوامخواہ کا کرتا دھرتا بنا ہوا تھا۔

پی ٹی آئی کے صدر کا کہنا تھا ق لیگ کے کسی رہنما سے میری کوئی بات یا میٹنگ نہیں ہوئی، یہ ہر جگہ غلط افواہیں پھیلا رہے ہیں۔ انہوں نے گجرات کا مینڈیٹ چوری کیا پہلے وہ واپس کریں پھر بات ہوگی۔