غزہ : اسرائیلی فوج کی پناہ گزین کیمپ پر بمباری، 29 فلسطینی شہید

غزہ میں اسرائیلی فوج نے پناہ گزین کیمپ پر بمباری کر دی جس کے نتیجے میں 29 سے زائد فلسطینی شہید اور درجنوں زخمی ہو گئے ہیں۔

اسرائیل کی غزہ میں گزشتہ 9 مہینے سے جارحیت جاری ہے تاہم اتنا وقت گزرنے کے بعد بھی اسرائیلی فوج کی جانب سے نہتے فلسطینیوں پر جارحیت کا سلسلہ نہ رک سکا۔

میڈیا رپورٹ کے مطابق غزہ کی وزارت صحت کا کہنا ہے کہ جنوبی غزہ میں خان یونس شہر کے مشرق میں اباسان الکبیرہ قصبے میں العودہ سکول کے گیٹ کے باہر اسرائیل کی جانب سے فضائی حملہ ہوا جس میں کم از کم 29 افراد شہید ہوگئے۔

دوسری جانب اسرائیلی فوج کا کہنا ہے کہ ہم نے حماس کے عسکری ونگ سے تعلق رکھنے والے ایک دہشت گرد کو نشانہ بنانے کے لیے گولہ باری کی۔

یہ واقعہ ایسے وقت میں پیش آیا ہے جب ایک ہفتے قبل اسرائیلی فوج نے شہریوں کو مشرقی خان یونس اور دیگر علاقوں کو خالی کرنے کا حکم دیا تھا، جس سے ہزاروں افراد نقل مکانی پر مجبور ہوئے۔

رپورٹ کے مطابق چار دن میں اسرائیل کی جانب سے بے گھر افراد کو پناہ دینے والے اسکولوں پر یہ چوتھا حملہ ہے۔

یاد رہے کہ 7 اکتوبر سے غزہ میں جاری اسرائیلی جارحیت میں اب تک 38 ہزار سے زائد فلسطینی شہید ہوچکے ہیں۔