جوبائیڈن کیلئے مزید مشکلات، پارٹی رہنمائوں کا حمایت ختم ہونے کا خدشہ

امریکی ایوان نمائندگان کی سابق سپیکر نینسی پیلوسی نے ڈیموکریٹک پارٹی کی جانب سے صدر جو بائیڈن کو صدارتی دوڑ میں رہنے کے لیے مکمل حمایت ختم ہونے کے خدشے کا اظہار کیا ہے۔

انہوں نے کہا کہ کسی بھی وقت پوری جماعت کی طرف سے جو بائیڈن کی حمایت ختم ہوسکتی ہے۔

پیلوسی ڈیموکریٹک پارٹی کی نمایاں رہنماؤں میں سے ایک ہیں ، انہوں نے کہا کہ فیصلہ ان پر منحصر ہے اور وقت ختم ہو رہا ہے۔

انہوں نے بائیڈن کو تجویر دی کے بائیڈن صدارتی دوڑ میں شامل رہنے کے عزم سے متعلق اپنے فیصلے پر نظر ثانی کریں۔

پیلوسی نے کہا کہ یہ صدر پر منحصر ہے کہ وہ انتخاب لڑیں گے یا نہیں۔ ہم سب ان کی حوصلہ افزائی کرتے ہیں کہ وہ یہ فیصلہ کریں کیونکہ وقت ختم ہو رہا ہے۔ میں چاہتی ہوں کہ وہ خود ہی فیصلہ کریں۔ وہ جو بھی فیصلہ کریں گے ہم ان کے ساتھ چلیں گے۔

انہوں نے کہا کہ بائیڈن کے سیاسی مستقبل پر بحث نیٹو سربراہی اجلاس کے بعد دوبارہ شروع ہونی چاہیے۔

دوسری جانب ڈیموکریٹک پارٹی کے ارکان نے کہا کہ بڑے عطیہ دہندگان کو بائیڈن کی صدارت سنبھالنے کی صلاحیتوں کے بارے میں شدید تحفظات ہیں۔

وائٹ ہاؤس گذشتہ ماہ ہونے والی صدارتی بحث میں بائیڈن کی ناقص کارکردگی کے اثرات کے بعد مشکل سے دوچار ہے۔ خراب کارکردگی نے جوبائیڈن کے سیاسی مستقبل، دوبارہ الیکشن جیتنے اور ملک کی صدارت سنبھالنے کے حوالے سے خدشات پیدا کر دیے ہیں۔