پی ٹی آئی کو مخصوص نشستیں واپس ملنے پر کارکن کا انوکھے انداز میں جشن، غرباء میں گندم تقسیم کر دی

پاکستان کی اعلیٰ عدلیہ کی جانب سے پاکستان تحریک انصاف کے حق میں فیصلہ آنے کے بعد پی ٹی آئی کے کارکنان جہاں دنیا بھر میں جشن منا رہے ہیں، وہاں کچھ کارکنان نے انوکھے انداز میں جشن منا کر مثال قائم کر دی۔ 
ذرائع کے مطابق پی ٹی آئی کے ایک اوورسیز کارکن نے پی ٹی آئی کی مخصوص نشستیں واپس ملنے پر پاکستان میں موجود ایک غریب کسان سے اس کی ساری گندم اچھے داموں میں خرید لی۔ غریب کسان کی گندم بک نہیں رہی تھی، جس کے لیے وہ کافی پریشان تھا۔ 
اوورسیز پی ٹی آئی کارکن نے غریب کسان سے خریدی گئی ساری گندم پاکستان میں موجود مستحقین اور غرباء میں تقسیم کر دی۔ 
پاکستان تحریک انصاف کے اوورسیز کارکن کا یہ اقدام پی ٹی آئی حلقوں میں بہت زیادہ سراہا جا رہا ہے۔ جنوبی پنجاب سے تعلق رکھنے والے ایک پی ٹی آئی کے رہنما نے باقی کارکنان کو بھی مٹھائیاں تقسیم کرنے کے بجائے غریب لوگوں کی مدد کرنے کی درخواست کر دی۔ پی ٹی آئی رہنما نے کہا کہ اس مہنگائی کے دور میں مٹھائیاں بانٹنے سے بہتر ہے کہ مستحقین کی مدد کر دی جائے، تا کہ صدقہ بھی ادا ہو جائے۔
واضح رہے کہ پی ٹی آئی کی جانب سے الیکشن کمیشن کے خلاف  مخصوص نشستوں کا کیس سپریم کورٹ میں دائر تھا۔ آج سپریم کورٹ کے بینچ نے محفوظ فیصلہ سناتے ہوئے مخصوص نشستیں پی ٹی آئی کو واپس دیے جانے کا حکم جاری کر دیا۔ مخصوص نشستیں ملنے کے بعد پی ٹی آئی قومی اسمبلی کی سب سے اکثریت والی جماعت بن جائے گی۔