اسرائیلی فوج کی پناہ گزین کیمپ پر بمباری سے 71 فلسطینی شہید

غزہ میں پناہ گزین کے کیمپ پر اسرائیل کی جانب سے فضائی بمباری میں مزید 71 فلسطینی شہید ہوگئے۔

غیر ملکی خبر رساں ادارے کے مطابق غزہ کی وزارت صحت کی طرف سے جاری ہونے والے ایک بیان میں کہا گیا ہے کہ المواصی کیمپ میں اسرائیل کے وحشیانہ حملے میں 71 سے زیادہ افراد شہید جبکہ 289 زخمی ہو گئے ہیں۔

یہ المواصی کے علاقے میں بڑے پیمانے پر ہلاکتوں کا تازہ ترین واقعہ ہے۔ اسرائیلی حملوں سے فرار ہو کر ہزاروں فلسطینی اس جنوبی علاقے کے مہاجر کیمپ میں پناہ لیے ہوئے ہیں۔ اس جنگ میں عام شہریوں کی ہلاکتوں پر عالمی سطح پر شدید غم و غصہ پایا جاتا ہے۔

اسرائیلی حملے میں زخمی ہونے والوں میں زیادہ تعداد خواتین اور بچوں کی تھی، جنہیں النصیر ہسپتال لے جایا گیا، ہسپتال کے حکام کا کہنا تھا کہ وہ اسرائیلی جارحیت اور طبی سامان کی قلت کی وجہ سے زیادہ لوگوں کو طبی امداد فراہم کرنے کے قابل نہیں ہیں۔

اسرائیلی فوج نے کہا ہے کہ اس نے انٹیلی جنس کی بنیاد پر ایک ایسے علاقے میں حملہ کیا، جہاں حماس کے دو سینئر دہشت گرد شہریوں کے درمیان چھپے ہوئے تھے۔

اسرائیلی فوج نے کہا کہ اس نے ہفتے کے روز غزہ پر حملے میں حماس کے عسکری رہنما محمد ضیف اور خان یونس بریگیڈ کے کمانڈر رافا سلما کو نشانہ بنایا ہے۔

دوسری جانب حماس نے ابھی تک ان دونوں کمانڈروں کی مبینہ شہادت  کی کوئی تصدیق یا تردید سامنے نہیں کی۔