9 مئی مقدمات: عمران خان کی عبوری ضمانت خارج کرنے کیخلاف درخواست سماعت کیلئے مقرر

لاہور ہائی کورٹ نے بانی پاکستان تحریک انصاف عمران خان کی 9 مئی کے 3 مقدمات میں عبوری ضمانت خارج کرنے کے خلاف درخواست کو 22 جولائی کو سماعت کے لیے مقرر کردیا ہے۔

اس درخواست کی سماعت لاہور ہائی کورٹ کے جسٹس شہرام سرور اور جسٹس امجد رفیق کے بینچ نے کی ہے، جہاں رجسٹرار آفس کے اعتراضات کو ختم کیا گیا ہے۔

اعتراضات کے مطابق درخواستوں میں سابق وزیراعظم عمران خان کے انگوٹھے کے نشانات نہیں موجود اور ایک مقدمے کی درخواست میں ایف آئی آر کی کاپی لف نہیں ہے۔ اس طرح دورکنی بینچ نے اعتراضات ختم کرتے ہوئے بانی پی ٹی آئی کی عبوری ضمانتیں خارج کرنے کے خلاف درخواستوں کو 22 جولائی کو سماعت کے لیے مقرر کیا ہے۔

یاد رہے کہ عمران خان نے انسداد دہشت گردی عدالت کے فیصلے کی لاہور ہائی کورٹ میں چیلنج کیا ہے اور موقف اختیار کیا ہے کہ ٹرائل کورٹ نے حقائق کے برعکس عبوری ضمانتیں خارج کی ہیں۔

درخواست میں عدالت سے استدعا کی گئی کہ لاہور ہائیکورٹ بانی پی ٹی آئی عمران خان کی عبوری ضمانتیں منظور کرے۔