اسرائیلی پارلیمنٹ میں اقوام متحدہ کی مرکزی امدادی تنظیم کو دہشتگرد قرار دینے کا بل منظور

اسرائیلی پارلیمنٹ نے پیر کو ایک بل کو ابتدائی منظوری دے دی جس میں فلسطینیوں کے لیے اقوام متحدہ کی مرکزی امدادی تنظیم (انروا) کو دہشت گرد تنظیم قرار دیا گیا ہے۔

فلسطینی پناہ گزینوں کے لیے اقوام متحدہ کی ریلیف اینڈ ورکس ایجنسی (UNRWA) کے خلاف ووٹنگ اس ایجنسی کے خلاف اسرائیلی دباؤ کا تازہ ترین قدم ہے، جس پر اسرائیلی رہنماؤں نے غزہ میں اسلامی تحریک حماس کے ساتھ تعاون کرنے کا الزام لگایا ہے۔

خبر ایجنسی کے مطابق پارلیمنٹ سے منظوری کے بعد بل امور خارجہ اور ڈیفنس کمیٹی کے سامنے پیش کیا جائے۔

فلسطین، لبنان، اردن اور شام کے علاقوں میں فلسطینیوں کی تعلیم اور صحت سے متعلق کام کرنے والےادارے انروا اور اسرائیلی حکومت کے درمیان تعلقات ہمیشہ تناؤ کا شکار رہے ہیں تاہم 7 اکتوبر کے بعد اسرائیل کی غزہ میں جنگ کے بعد تعلقات کی تلخی میں مزید اضافہ ہوا ہے۔

اسرائیلی پارلیمنٹ کے اقدام پر ردعمل دیتے ہوئے انروا کے ترجمان جولیٹ ٹوما کا کہنا تھا کہ ایجنسی کو بند کرنے کی ایک وسیع مہم کے ذریعے یہ ایک اور کوشش کی گئی ہے، ایسے اقدامات اقوام متحدہ کی تاریخ میں پہلے کبھی نہیں دیکھے گئے۔

حماس اور فلسطینی اتھارٹی کی جانب سے بھی انروا کو دہشتگرد تنظیم قرار دینے کے اسرائیلی پارلیمنٹ کے اقدام کی شدید الفاظ میں مذمت کرتے ہوئے اپیل کی گئی ہے کہ عالمی برادری انروا کو بند کرنے کی سازش کے خلاف مزاحمت کرے۔

انروا غزہ، مغربی کنارے، اردن، لبنان اور شام میں لاکھوں فلسطینیوں کو تعلیم، صحت اور امداد فراہم کرتا ہے۔ اسرائیل کے ساتھ اس کے طویل عرصے سے کشیدہ تعلقات رہے ہیں لیکن غزہ میں جنگ کے آغاز کے بعد سے تعلقات تیزی سے خراب ہوئے ہیں۔