امریکا پاکستان کو 10 کروڑ 10 لاکھ ڈالر امداد دے گا، ڈونلڈ لو

واشنگٹن:امریکی اسسٹنٹ سیکرٹری برائے جنوبی و وسط ایشیا ڈونلڈ لو نے کہا ہے کہ امریکی صدر نے پاکستان کے لیے 10 کروڑ 10 لاکھ ڈالر امداد کی درخواست کی ہے۔

ڈونلڈ لو نے کہا کہ امریکہ پاکستان کی جمہوریت اور انسانی حقوق کی حمایت پر توجہ مرکوز کر رہا ہے۔

امریکی ایوان نمائندگان کی کمیٹی میں پیشی کے موقع پر ڈونلڈ لو نے کہا کہ امریکی صدر نے پاکستان کے لیے 10 کروڑ 10 لاکھ ڈالر امداد کی درخواست کی ہے۔

انہوں نے کمیٹی کو بتایا کہ یہ رقم پاکستان کو دہشت گردی کے خلاف جنگ، اقتصادی اصلاحات اور قرض میں مدد کے لیے دی جائے گی۔

ڈونلڈ لو نے کہا کہ امدادی رقم سے پاکستان کو اپنی معیشت کو مستحکم کرنے میں مدد ملے گی۔

انہوں نے یہ بھی کہا کہ افغانستان میں خواتین اور اقلیتی گروہوں کی صورت حال تشویشناک ہے۔ ڈونلڈ لو نے کہا کہ افغان شہریوں کے حقوق کے احترام تک طالبان حکومت سے تعلقات معمول پر نہیں آسکتے۔