وزیراعلیٰ پنجاب مریم نواز کی جرمنی کے سفیر سے ملاقات 

وزیراعلیٰ پنجاب مریم نواز سے جرمن سفیر الفریڈ گراناس نے لاہور میں ملاقات کی۔

ملاقات کے دوران دونوں رہنماؤں نے باہمی تعلقات کو مضبوط بنانے کے عزم کا اعادہ کیا۔ مریم نواز نے جرمنی میں پاکستانی سفارت خانے پر شر پسندوں کے حملے پر جرمن حکام کے فوری ایکشن کی تعریف کی۔

ملاقات میں دو طرفہ تعلقات کے فروغ، اقتصادی تعاون، ٹیکنیکل ایجوکیشن اور قابل تجدید توانائی میں تعاون پر تبادلہ خیال کیا گیا۔

وزیراعلیٰ پنجاب نے جرمنی کی جانب سے پنجاب کے ترقیاتی شعبوں میں جاری تعاون اور سرمایہ کاری کی تعریف کی۔ انہوں نے قابل تجدید توانائی، پیشہ ورانہ تربیت اور انفارمیشن ٹیکنالوجی سمیت مختلف شعبوں میں مزید تعاون کے امکانات کا جائزہ لیا۔

جرمن سفیر نے پنجاب کے ساتھ باہمی تعلقات کو مضبوط بنانے کے عزم کا اعادہ کیا اور پنجاب میں غیر ملکی سرمایہ کاری کے لیے سازگار ماحول پیدا کرنے میں صوبائی حکومت کی کاوشوں کی تعریف کی۔

وزیراعلیٰ پنجاب نے کہا کہ نوجوانوں کو ایسی سکلز سے آراستہ کرنا چاہتے ہیں جو جاب مارکیٹ کے تقاضوں کو پورا کرتی ہیں، جرمنی قابل تجدید توانائی کے امور میں گلوبل لیڈر ہے، جرمنی نے ماحول دوست اقدامات کر کے انسانیت کی خدمت کی ہے، پنجاب کے شہریوں کو کلین اینڈ گرین انرجی فراہم کرنے کے لیے سولرائزیشن منصوبہ شروع کیا ہے۔

دونوں رہنماؤں نے پائیدار ترقی کے اہداف کے حصول، جدت اور تکنیکی ترقی کو فروغ دینے میں باہمی تعاون پر اتفاق کیا۔

وزیراعلیٰ پنجاب مریم نواز نے جرمن سرمایہ کاروں اور کاروباری اداروں کو درکار سہولیات کی فراہمی میں بھرپور معاونت کا یقین دلایا۔

ملاقات کے دوران پنجاب میں فنی تعلیم اور پیشہ ورانہ تربیت کے پروگراموں کو بڑھانے کے اقدامات پر بھی تبادلہ خیال کیا گیا۔

وزیراعلیٰ پنجاب نے پنجاب کے شہریوں کو کلین اینڈ گرین انرجی فراہم کرنے کے لیے سولرائزیشن منصوبہ شروع کرنے کا اعلان کیا۔

جرمنی واقعہ کے حوالے سے بات کرتے ہوئے وزیراعلیٰ پنجاب مریم نواز کا کہنا تھا کہ امید ہے جرمنی واقعہ میں ملوث افراد کو کیفرِ کردار تک پہنچا یا جائے گا اور مستقبل میں ایسے واقعات نہیں ہوں گے۔