سابق برطانوی وزیرعظم رشی سونک نے پارٹی عہدے سے استعفیٰ دیدیا

گلاسگو :  سابق وزیراعظم رشی سونک نے کنزرویٹوپارٹی کے لیڈر کے عہدے سے باضابطہ طور پر استعفیٰ دے دیا۔
برطانوی میڈیا کے مطابق نئے لیڈر کے انتخاب تک رشی سونک قائم مقام کے طور پر قیادت کریں گے۔

میڈیا رپورٹ کے مطابق کنزرویٹو پارٹی کے نئے لیڈر کے انتخاب کے عمل کا آغاز ہوگیا ہے اور آج سے 29 جولائی تک کاغذات نامزدگی جمع کرائے جاسکتے ہیں، امیدواروں کو ووٹنگ کے پہلے دور کیلئے 10 ایم پیز کی حمایت درکار ہوگی جبکہ حتمی 2 امیدواروں میں کسی ایک کا انتخاب ووٹ سے مشروط ہوگا۔

رپورٹ میں بتایا گیا کہ نئے لیڈر کے انتخاب تک رشی سونک قائم مقام کے طور پر قیادت کریں گے۔ کنزرویٹو پارٹی کے سربراہ کا انتخاب آن لائن ووٹنگ سے کرایا جائے گا اور پارٹی کے نئے سربراہ کا اعلان 2 نومبر کو ہوگا۔

ذرائع کے مطابق ا گرچہ ابھی تک کسی ممبر نے بھی باضابطہ طور پر اس بات کی تصدیق نہیں کی کہ وہ پارٹی لیڈر کے الیکشن میں حصہ لے رہے ہیں لیکن ممکنہ امیدواروں میں سابق وزیر میل سٹرائیڈ، سابق امیگریشن منسٹر رابرٹ جینرک، سابق ہوم سیکرٹری سویلا بریورمین اور پریٹی پٹیل، شیڈو ہوم سیکرٹری جیمز کلیورے، شیڈو سیکورٹی منسٹر ٹام ٹو گینڈ ہاٹ اور شیڈو کمیونٹی سیکرٹری کمی بیڈ نوک شامل ہیں۔

پارٹی لیڈر کے الیکشن میں صرف وہی ممبران ووٹ دینے کے اہل ہوں گے جو بیلٹ بند ہونے سے پہلے90دن تک یا اس سے زیادہ عرصہ پارٹی کے رکن رہے ہوں۔

برطانیہ کے سابق وزیراعظم رشی سوناک کا کہنا ہے کہ وہ نئے پارٹی لیڈر کے چنائو تک پارٹی لیڈر کے طور پر کام کرتے رہیں گے، جو ہمارے قومی اور پارٹی کے مفاد میں ہے کہ اپوزیشن کی سب سے بڑی پارٹی کے نئے رہنما کی ہموار اور منظم طریقے سے تبدیلی ہوسکے۔