دھرنے میں رکاوٹ ڈالی تو حکومت کو گٹنے ٹیکنے پر مجبو رکردیں گے ، حا فظ نعیم

اسلام آباد: امیر جماعت اسلامی حافظ نعیم الرحمان نے کہا ہے کہ ہم حکومت کو گھٹنے ٹیکنے پر مجبور کردیں گے۔

حافظ نعیم الرحمان نے راولپنڈی میں دھرنے کے شرکاء سے خطاب کرتے ہوئے کہا کہ ہم ہر صورت پر امن رہنا چاہتے ہیں، رکاوٹیں کھڑی کی جائیں گی تو توڑی بھی جائیں گی۔

انہوں نے کہا کہ نااہل حکمرانوں کے آئی پی پیز کے معاہدے ناجائز ہیں، نااہلی آپ کی تو پیسے عوام کیوں دیں؟ عوام پر بجلی کے بم گر رہے ہیں۔

امیر جماعت اسلامی نے یہ بھی کہا کہ ابھی تو دھرنوں کا اعلان کیا ہے، ہڑتال کا آپشن باقی ہے، ڈی چوک اور پارلیمنٹ کا آپشن بھی کھلا ہے، جب ہڑتال ہوگی تو ساری فیکٹریاں بھی بند ہوں گی۔

 وزیراعظم پاکستان کو مخاطب کرتے ہوئے حافظ نعیم الرحمان کا کہنا تھا کہ شہباز شریف صاحب! ہمارا موڈ سمجھ لیں، ریلیف لینے آئے ہیں، مطالبات کو مان لیں اسی میں بھلائی ہے۔

انہوں نے مزید کہا کہ ہم حکومت کو گھٹنے ٹیکنے پر مجبور کردیں گے، کنٹینرز ہمارا راستہ نہیں روک سکتے، یہ چاہتے ہیں کہ آئی پی پیز کا دھندا چلتا رہے۔