مہنگائی کیخلاف جماعت اسلامی کا دھرنا پانچویں روز بھی جاری

راولپنڈی: مہنگائی اور مہنگے بجلی کے بلوں کے خلاف جماعت اسلامی کا دھرنا پانچویں روز بھی جاری ہے۔ مون سون کی بارشوں کے باوجود دھرنے میں شرکت کرنے والے کارکنان اپنے مطالبات مانے جانے تک دھرنے پر ڈٹے ہوئے ہیں۔

امیر جماعت اسلامی حافظ نعیم الرحمان بھی دھرنے میں شریک ہوئے اور کارکنوں سے خطاب کرتے ہوئے کہا کہ حکومت ایک طرف مذاکرات کی بات کر رہی ہے اور دوسری طرف دھرنے میں رکاوٹیں کھڑی کر رہی ہے۔ انہوں نے کہا کہ بجلی کے بل لوگوں کے لیے بوجھ بن چکے ہیں اور اگست میں تو یہ اور بھی زیادہ بڑھ جائیں گے۔ انہوں نے عوام سے اپیل کی کہ وہ اس معاملے پر متحد رہیں۔

گزشتہ روز حکومتی وفد سے مذاکرات کا دوسرا دور شروع نہیں ہو سکا تھا۔ جماعت اسلامی کے رہنماؤں کا کہنا ہے کہ حکومت سنجیدہ نہیں ہے اور صرف وقت گزار رہی ہے۔

دھرنے میں شرکت کرنے والی خواتین کا کہنا ہے کہ وہ اپنے حقوق کے لیے آواز اٹھانے سے نہیں گھبرائیں گی۔ انہوں نے کہا کہ جب تک حکومت ان کے مطالبات نہیں مانتی، وہ دھرنے پر ڈٹی رہیں گی۔

جماعت اسلامی نے اعلان کیا ہے کہ گورنر ہاؤس کراچی میں بدھ سے ایک اور دھرنا شروع کیا جائے گا۔