ایرانی سپریم لیڈر کا اسرائیل پر براہ راست حملے کا حکم

تہران: امریکی اخبار نے دعویٰ کیا ہے کہ ایرانی سپریم لیڈر آیت اللہ خامنہ ای نے اسماعیل ہنیہ کی شہادت کے فوری بعد ایک ہنگامی اجلاس میں ایران کی سپریم نیشنل سیکیورٹی کونسل کو اسرائیل پر حملے کا حکم دیا ہے۔

غیر ملکی میڈیا رپورٹس کے مطابق آیت اللہ خامنہ ای نے کہا ہے کہ اسرائیل نے اپنے لیے سخت سزا کی بنیاد فراہم کر دی ہے اور ایران اپنے ملک کے اندر ہونے والے اسماعیل ہنیہ کے قتل کا بدلہ لینا اپنا فرض سمجھتا ہے۔ ایرانی سپریم لیڈر نے کہا کہ صیہونی حکومت نےہمارے گھر میں ہمارے مہمان کو شہید کر کے ہمیں سوگوار کر دیا ہے۔

آیت اللہ خامنہ ای نے اسماعیل ہنیہ کے قتل پر اپنے ردعمل میں کہا کہ ہنیہ نے ایک قابلِ عزت راہ میں سالوں تک جان داؤ پر لگا کر جدوجہد کی اور شہادت کے لیے ہمیشہ تیار رہے۔ انہوں نے اپنے لوگوں اور بچوں کو بھی اس راہ پر قربان کیا۔