عالمی وبا : امریکی ریاستوں میں کورونا پابندیوں میں نرمی کا اعلان

تفصیلات کے مطابق نیویارک میں  تجارتی اور معاشرتی پابندیاں فوری طور پر ختم  کردی گئیں ۔ نیو یارک کے ریستورانوں میں میزوں کے درمیان 6 فٹ فاصلے کی پابندی ختم کردی گئی۔ سینما گھروں میں بھی ہاؤس فل ہوگا۔ کمرشل عمارتوں میں داخل ہونے والوں کا ٹمپریچر چیک نہیں کیا جائے گا۔ رپورٹس کے مطابق نیویارک میں 70 اور کیلی فورنیا میں 72 فیصد بالغ افراد ویکسین کی کم سے کم ایک خوراک لے چکے ہیں۔ نیو یارک کے بڑے شہروں میں آتشبازی  کرکےپابندیاں ختم ہونےکاجشن منایاگیا ، جبکہ مشہور ایمپائر اسٹیٹ بلڈنگ اور دیگر سرکاری  عمارتیں  رنگوں میں نہاگئیں۔ گورنر آفس کے مطابق کاروباروں کو اب ماسک پہننے اور چھ فٹ (2 میٹر) فاصلہ برقرار رکھنے کی ضرورت نہیں ہوگی۔

خیال رہے کہ کورونا وائرس کے کیسز اور اس سے اموات کے اعتبار سے 10 سرِ فہرست ممالک میں 33 کروڑ سے زائد آبادی کا حامل امریکا تا حال پہلے نمبر پر ہے جہاں اس وائرس سے اب تک 6 لاکھ 15 ہزار سے زائد افراد موت کے منہ میں پہنچ چکے ہیں جبکہ اس سے بیمار ہونے والوں کی مجموعی تعداد 3 کروڑ 43 لاکھ 35 ہزار سے زائد  ہو چکی ہے۔

واضح رہے کہ دنیا  بھر میں کورونا کیسز کی تعداد 17کروڑ 74 لاکھ سے تجاوز کرگئی ہے جبکہ  اس موذی وائرس سے اموات 38 لاکھ 38 ہزار سے تجاوز کر گئیں۔