تحریک انصاف کا گرینڈ الائنس بلانے کا اعلان

پاکستان تحریک انصاف کے رہنما اور اسمبلی میں اپوزیشن لیڈر عمر ایوب نے کہا کہ آئندہ 2 ہفتےمیں گرینڈ الائنس بلانے جارہے ہیں، گرینڈالائنس کیلئے تمام جماعتوں سے رابطے ہوں گے۔

اڈیالہ جیل کے باہر اسد قیصر کے ہمراہ میڈیا سے گفتگو کرتے ہوئے عمر ایوب نے کہا کہ بانی پی ٹی آئی کا پیغام ہے کہ عوام 5 اگست کوصوابی پہنچیں اور عمران خان سے محبت کا ثبوت دیں۔ ہمارے اتحاد کا نام تحریک تحفظ آئین پاکستان ہے۔

عمرایوب کا مزید کہنا تھا کہ پی پی اورن لیگ کےپاور پلانٹس کی وجہ سے بجلی مہنگی ہوئی، ایوان صدر اور وزیراعظم ہاؤس کے خرچے بڑھ گئے ہیں۔ عوام پرٹیکس اور بوجھ بڑھ رہے ہیں جبکہ اپنےلئےمزے ہیں ۔

اپوزیشن لیڈر نے بتایا کہ پی ٹی آئی دورمیں ایوان صدراوروزیراعظم ہاؤس کے خرچے کم کیے تھے بشریٰ بی بی کے حوالے سے انکا کہنا تھا کہ بشریٰ بی بی کو کس جرم میں جیل میں رکھا گیا ہے، بشریٰ بی بی کا جرم کیا ہے؟ بشریٰ بی بی کا توشہ خانہ سے کوئی تعلق نہیں۔

انہوں نے کہا کہ بانی پی ٹی آئی نےاسماعیل ہنیہ کی شہادت پرافسوس کااظہارکیا، حماس رہنما کو ایران کی سرزمین پر شہید کرنے سے مسلمانوں میں غم وغصہ ہے، مغربی ممالک اسرائیلی جارحیت پرکیوں خاموش ہیں؟ کیا اسرائیل کوکوئی روکنےوالا نہیں ہے؟ عالمی برادری اسرائیل کوفلسطینیوں کے قتل عام سے روکے۔

اسد قیصر نے کہا کہ ان تمام جماعتوں کوملائیں گےجورجیم چینج کےخلاف ہیں، جوسڑکوں پرتحریک چلارہے ہیں ہم ان کواکھٹا کریں گے۔ تمام سیاسی قیدیوں کی رہائی کیلئے آواز اٹھائیں گے۔ہم جماعت اسلامی کے دھرنے اور مطالبات کی حمایت کرتے ہیں یہ ملک آئین وقانون کے مطابق چلے گا، مہنگائی اوربجلی کی قیمتوں میں اضافہ قبول نہیں کریں گے۔

سابق اسپیکر قومی اسمبلی نے کہا کہ جب تک آئین پر تمام سیاسی جماعتیں عمل نہیں کریں گی ملک آگے نہیں بڑھے گا۔یہ ملک آئین و قانون کے مطابق چلے گا ، ہمیں کسی صورت بجلی بلوں میں اضافہ قبول نہیں ہے۔ آج سابق چیئرمین پی ٹی آئی سے بات چیت ہوئی ہے، پی ٹی آئی بجلی بلوں میں اضافے کیخلاف جماعت اسلامی کےمطالبات کو سپورٹ کرتی ہے ۔