پولیس شہدا ءکی قربانیاں رائیگاں نہیں جائیں گیں ، بلاول بھٹو

پاکستان پیپلز پارٹی کے چیئرمین بلاول بھٹو زرداری نے یومِ شہداء پولیس کے موقع پرپیغام دیتے ہوئے کہا کہ شہداء پولیس کی قربانیاں رائیگاں نہیں جائیں گی۔

بلاول بھٹو نے کہا کہ پولیس شہداء کی غیر متزلزل لگن اور بے لوث خدمات ان کے عزم کی آئینہ دار  ہے، چاروں صوبوں کے پولیس اہلکاروں نے دہشت گردی کے خلاف بھی  جواں مردی سے جنگ لڑی ہے۔

چیئرمین بلاول بھٹو زرداری نے ادائیگیِ فرائض کی خاطر جانیں قربان کرنے والے پولیس شہداء  کو خراج عقیدت پیش کرتے ہوئے کہا کہ قانون کی حکمرانی اور شہریوں کی حفاظت کے لئے پولیس شہداء کی  قربانیاں  بے مثال ہیں۔

 بلاول بھٹونے اپنے پیغام یہ بھی کہا کہ شہداء نے قربانیاں دے کر عوام کی حفاظت اور انصاف و  دیانت داری کی اقدار کی پاسداری کی ہے، ہمیں اپنی پولیس فورس کی کاوشوں اور جراَت کی حوصلہ افزائی کرنا چاہیے۔

 بلاول بھٹو نے کہا کہ پیپلز پارٹی قانون نافذ کرنے والے اداروں کی فلاح و بہبود اور حمایت کا عزم رکھتی ہے، تاکہ انہیں مؤثر طریقے سے اپنے فرائض کی انجام دہی کے لئے سازوسامان اور اختیارات فراہم کیے جائیں۔

 بلاول بھٹو نے کہا کہ ہماری پولیس کے جوان قابلِ احترام جذبے کے ساتھ خدمات سرانجام دے رہے ہیں، پیپلز پارٹی پولیس شہداء کے خاندانوں کے ساتھ یکجہتی کا اظہار کرتی ہے، اور پولیس کو ان کی بے پناہ قربانی پر سلام  پیش کرتی ہے۔