پاور سیکٹر میں ریفارمز کےلئے ٹاسک فورس قائم کر دی گئی

پاور سیکٹر میں ریفارمز کےلئے ٹاسک فورس قائم کر دی گئی، لیفٹیننٹ جنرل محمد ظفر اقبال ٹاسک فورس کے چیئرمین ہوں گے۔گریڈ 21 کے افسر سید ذکریا علی شاہ ٹاسک فورس کے ممبر ہوں گے۔

پاور سیکٹر میں سٹرکچرل ریفارمز پر عملدرآمد کیلئے ٹاسک فورس قائم  کردی گئی، 8 رکنی ٹاسک فورس کا قیام وزیراعظم کی طرف سے عمل میں لایا گیا ہے،وفاقی وزیر توانائی اویس لغاری 8رکنی ٹاسک فورس کی رہنمائی کریں گے۔،وزیراعظم کے معاون خصوصی محمد علی ٹاسک فورس کے شریک چیئرمین ہوں گے، ٹاسک فورس کے  ٹی او آرز بھی جاری کردیئے گئے۔

ٹی او آرز میں کہا گیاکہ  ٹاسک فورس کیپسٹی پیمنٹس کم کرنے، بعض پاور پلانٹس بند کرنے کیلئے سفارشات مرتب کرے گی، ٹاسک فورس آئی پی پیز کے قیام پیداواری لاگت سے متعلق اقدامات کا جائزہ لے گی، آئی پی پیز کے قیام میں غیرقانونی اقدام، طریقہ کار میں نقائص، ریگولیٹری خامیوں کی نشاندہی کرے گی۔

ٹی او آرز کے مطابق ٹاسک فورس آئی پی پیز کے حکومت کیساتھ معاہدوں کی شرائط کی پاسداری کا جائزہ لے گی، ٹاسک فورس پاور سیکٹر کو مالی طور پر پائیدار بنانے کیلئے سفارشات دے گی،انڈسٹریز، اقتصادی زونز میں بجلی کی کھپت بڑھانے سے متعلق سفارشات مرتب ہوں گی،ٹاسک فورس پاور سیکٹر کے گردشی قرضے کے حل کیلئے اقدامات تجویز کرے گی،ٹاسک فورس ایک ماہ کے اندر اپنی سفارشات وزیراعظم کو پیش کرے گی۔