بھارت کے پاس مقبوضہ کشمیر پر قبضے کا کوئی جواز نہیں ہے ، وزیر اطلاعات

اسلام آباد: وفاقی وزیر اطلاعات عطاء اللہ تارڑ نے کہا ہے کہ مقبوضہ کشمیر پر بھارت کےغیرقانونی تسلط کا کوئی جواز نہیں۔

وزیر اطلاعات عطاءاللہ تارڑ نے وفاقی وزیر امور کشمیر و سیفران انجینئر امیر مقام کے ہمراہ پریس کانفرنس کرتے ہوئے کہا کہ انجینئر امیر مقام صاحب نے یوم استحصال کشمیر کے حوالے سے تاریخی مہم چلائی، 2019 کے بھارتی اقدامات کے ذریعے کشمیر کی خصوصی حیثیت کو ختم کیا گیا.

انہوں نے کہا کہ مقبوضہ جموں و کشمیر میں کشمیری عوام پر بھارت نے ظلم و ستم کے پہاڑ ڈھائے، مقبوضہ جموں و کشمیر پر بھارت کے غیر قانونی تسلط کا کوئی جواز نہیں۔

انکا کہنا تھا کہ پی ڈی ایم حکومت کے دوران شہباز شریف نے اقوام متحدہ کی جنرل اسمبلی سے خطاب میں بھی مطالبہ کیا کہ کشمیری عوام کو حق خود ارادیت دیا جائے، 2019 کے غیر قانونی، غیر اخلاقی اور بلا جواز اقدامات کے تحت مقبوضہ کشمیر کی خصوصی حیثیت کو ختم کیا گیا۔

عطاء تارڑ نے کہا کہ مقبوضہ جموں و کشمیر میں بھارت کی جانب سے انسانی حقوق کی مسلسل خلاف ورزی کی جا رہی ہے، حکومت پاکستان نے ہمیشہ مقبوضہ جموں و کشمیر میں بھارتی مظالم کی مذمت کی ہے، حکومت نہتے کشمیری عوام کی ہر طرح کی حمایت جاری رکھے گی۔

وفاقی وزیر اطلاعات نے مزید کہا کہ اقوام متحدہ کی قراردادوں کے مطابق مسئلہ کشمیر کا حل نکلنا چاہیے، مقبوضہ کشمیر کی خصوصی حیثیت بحال ہونی چاہیے۔