توشہ خانہ ریفرنس، عمران خان اور ان کی اہلیہ کے جسمانی ریمانڈ میں 11 روز کی توسیع

توشہ خانہ ریفرنس، احتساب عدالت نے نئے ریفرنس میں بانی پی ٹی آئی عمران خان اور ان کی اہلیہ بشریٰ بی بی کے جسمانی ریمانڈ میں 11 روز کی توسیع کردی۔

احتساب عدالت کے جج ناصر جاوید رانا نے عمران خان اور بشریٰ بی بی کیخلاف نئے توشہ خانہ ریفرنس کی سماعت اڈیالہ جیل میں کی۔

بشریٰ بی بی اور بانی پی ٹی آئی کو 10 روزہ جسمانی ریمانڈ مکمل ہونے پر سماعت کے لیے عدالت میں پیش کیا گیا، نیب کے ڈپٹی ڈائریکٹر محسن ہارون پراسیکیوٹر جنرل سردار مظفر عباسی کے ہمراہ عدالت میں پیش ہوئے۔

دوران سماعت نیب کی جانب سے بانی پی ٹی آئی اور بشریٰ بی بی کے مزید 14 روزہ جسمانی ریمانڈ کی استدعا کی گئی جس کی عمران خان اور بشریٰ بی بی کے وکلاء نے مخالفت کی۔

نیب کی جانب سے بانی پی ٹی آئی اور بشریٰ بی بی سے اب تک ہونے والی تفتیش کا ریکارڈ بھی عدالت میں پیش کیا گیا۔بعدازاں احتساب عدالت نے نیب کی استدعا مسترد کرتے ہوئے عمران خان اور بشریٰ بی بی کے جسمانی ریمانڈ میں 11 روز کی توسیع کرتے ہوئے کیس کی مزید سماعت 19 اگست تک ملتوی کردی۔

واضح رہے کہ  13 جولائی کو عدت نکاح کیس میں بریت کے بعد  نیب نے توشہ خانہ کے نئے ریفرنس میں عمران خان اور ان کی اہلیہ بشریٰ بی بی کو گرفتار کرنے کو کہا تھا اور  نیب ٹیم نے اڈیالہ جیل میں عمران خان اور بشریٰ بی بی کو گرفتار کیا تھا، واضح رہے کہ نیا کیس 7 گھڑیوں سمیت 10 قیمتی تحائف خلاف قانون اپنے پاس رکھنے اور بیچنے سے متعلق ہے۔