ملک بھر میں یوم آزادی کی تقریبات کیلئے تیاریاں عروج پر جاری

راولپنڈی اسلام آباد سمیت ملک بھر میں یوم آزادی کی تقریبات کی تیاریاں جوش وخروش سے جاری ہیں اس سلسلے میں گھروں ' دفاتر' شاہرائوں اورگلی محلوں کو خوبصورت قومی پرچموں اورجھنڈیوں سے سجایا گیا ہے ، وفاقی دارالحکومت کی سرکاری عمارتوں پرچراغاں کیاجارہاہے۔

گاڑیوں ، موٹر سائیکلوں ، رکشوں ، ٹیکسوں اورٹرکوں پر قومی پرچم آویزاں کیے گئے ہیں اس سلسلے میں نوجوان پارکوں اور عوامی مقامات پر ملی نغموں کی دھنوں رقص کرتے ہوئے ملک وقوم سے پیار اورمحبت کا اظہار کرتے دکھائی دیتے ہیں ۔

بازاروں اور شاہراہوں پر قومی پرچم ، قومی شاہراہ کی تصاویر والے بیجز اور جھنڈیوں کی فروخت کا سلسلہ بھی عروج پر ہے اس بار گزشتہ برسوں کی نسبت زیادہ جوش وخروش کا مظاہرہ کیاجارجارہا ہے ۔

مرد حضرات کے ساتھ خواتین بھی جشن آزادی کی خوشیاں منانے میں کسی سے پیچھے نہیں ہیں وہ قومی پرچم کے رنگوں والی چوڑیاں اور لباس کی خریداری میں مصروف ہیں اور اپنے علاوہ بچوں کیلئے بھی خصوصی ملبوت خرید رہی ہیں اس کے ساتھ ساتھ خواتین یوم آزادی پر خصوصی پکوانوں کی تیاریاں بھی کررہی ہیں۔

واضح رہے کہ قوم اس عزم کے ساتھ ستتر واں یوم آزادی منارہی ہے کہ وطن عظیم سے عظیم تر بنایاجائے گا ۔

جشن آزادی کے موقع پر وفاقی دارالحکومت سمیت ملک بھر میں تقریبات کا انعقاد کیاجائے گا جس میں آزادی کے حصول کیلئے عظیم قربانیاں دینے والوں کو خراج عقیدت پیش کیاجائے گا ۔