حکومت کو بھاگنے نہیں دیں گے، معاہدے کو پورا کرکے سانس لیں گے، امیر جماعت اسلامی

امیر جماعت اسلامی حافظ نعیم الرحمان نے کہا ہےکہ خیبر سے لے کر کراچی تک مارچ چلے گا، حکومت کو بھاگنے نہیں دیں گے، معاہدے کو پورا کرکے سانس لیں گے۔

پشاور میں مہنگائی، بجلی بلوں اور ٹیکسز میں اضافے کے خلاف منعقدہ جلسے سےخطاب کرتے ہوئے حافظ نعیم نے کہا کہ جماعت اسلامی  کسی کے اشارے پر نہیں چلتے اور نہ کسی امپائر کی انگلی پر چلتی ہے۔اس لیے  اگر 41 دنوں میں حکومت نے عوام کو ریلیف نہیں دیا تو کارکنوں کو ڈی چوک جانے سے نہیں روک سکوں گا۔

امیر جماعت اسلامی کا کہنا تھا کہ عوام ٹیکسز میں اضافہ، بجلی لوڈشیڈنگ اور تیل کی قیمتوں سے پریشان ہیں، 25 کروڑ عوام کا کوئی ترجمان نہیں، ملک میں اپوزیشن و حکومت نہیں، کارکنان تیار رہیں،طویل جدوجہد کرنا ہوگا۔ اگر کوئی سمجھتا ہےکہ پچھلے دھرنوں کی طرح جماعت اسلامی کا دھرنا بھی ناکام تھا تو یہ ان کی بھول ہے، جماعت اسلامی نے حکومت کے ساتھ تحریری معاہدہ کیا ہے۔

حافظ نعیم الرحمان نے کہا کہ مظلوموں کی آواز بن کر 41 دنوں تک دھرنے ہڑتالیں جاری رکھیں گے، لوگوں کو ریلیف دینا ہوگا کوئی دوسرا آپشن نہیں ہے، جماعت اسلامی کسی کے اشارے پر نہیں چلتی اگر 41 دنوں میں ریلیف نہیں دیا تو ڈی چوک سے کسی کو نہیں روک سکوں گا، عوام کو حق دینا ہوگا یا پھر حکومت کا تختہ دھڑام سے گرایا جائےگا۔

انہوں نے کہا کہ کچھ آئی پی پیز بجلی بنائے یا نہ بنائے ان کو پیسے دیے جاتے ہیں، ہم نے معاہدے میں لکھا ہے کہ آئی پی پیز کی مکمل جانچ پڑتال ہوگی، یہ لمبی جدوجہد ہے، کسی رکاوٹ کو قبول نہیں کرینگے۔