ایف بی آر اربوں کے ٹیکس وصول کرنے میں ناکام

فیڈرل بورڈ آف ریونیو (ایف بی آر) 85 ارب 63 کروڑ روپے کی ٹیکس وصولی میں ناکام رہا۔

آڈیٹر جنرل آف پاکستان نے ٹیکس کی عدم وصولی پر اپنی رپورٹ میں ایف بی آر  کی کارکردگی پر تشویش کا اظہار کردیا۔

رپورٹ میں کہا گیا کہ  سال 2021 -22 اور 2022-23  میں چارج شدہ ٹیکس وصول نہیں کیا جاسکا۔دو سالوں میں ایف بی آر کے 14 فیلڈ دفاتر میں 3 ہزار سے زائد کیسز میں ٹیکس وصول نہیں کیا گیا۔

رپورٹ کے مطابق 85 ارب 63 کروڑ روپے میں سے ایف بی آر نے صرف 28 کروڑ روپے وصول کیے ہیں۔ 5 ارب روپے سے زیادہ کی رقم کے معاملات عدالتوں میں زیر التواء ہیں۔

رپورٹ میں کہا گیا کہ ان بے ضابطگیوں کی نشاندہی فروری 2023 سے نومبر 2023 دوران کی گئیں۔

آڈیٹر جنرل آف پاکستان نے ٹیکس کی رقم کی ریکوری میں تیزی لانے کی ہدایت کردی۔

یا د رہے کہ رپورٹ میں انکشاف کیا گیا کہ سال 2018-19 اور سال 2019-20 میں بھی اس طرح کی بے ضابطگیاں سامنے آئیں تھیں۔