غزہ میں جنگ بندی کی صورت میں ایران انتقامی کارروائی چھوڑ سکتا ہے ، صدر بائیڈن

امریکی صدر جو بائیڈن کا کہنا ہے کہ وہ اس بات کی توقع رکھتے ہیں کہ اگر غزہ میں جنگ بندی ہو گئی تو ایران اپنے انتقامی حملے سے پیچھے ہٹ سکتا ہے۔

غیر ملکی خبر رساں ادارے کے مطابق بائیڈن کا کہنا ہے کہ غزہ کی پٹی میں فائر بندی کا معاہدہ طے پانے کی صورت میں ایران متوقع طور پر اسرائیل کو نشانہ بنانے کے منصوبے کو چھوڑ سکتا ہے۔

ایران نے اسماعیل ہنیہ کے قتل کا بدلہ لینے کے لیے اسرائیل پر حملے کی تیاری مکمل کرلی ہے تاہم امریکا سمیت مغربی ممالک اس حملے کو روکنے کے لیے کمر بستہ ہوگئے۔

امریکی صدر نے خبردار کیا کہ اگر ایران نے اسرائیل پر حملہ کیا تو اسرائیل اور حماس کے درمیان ہونے والے امن معاہدے تک پہنچنے کا عمل پیچیدہ ہوجائے گا۔

خیال رہے کہ امریکی صدر نے گزشتہ روز اس امید کا اظہار کیا تھا کہ اسرائیل اور حماس کے درمیان جنگ بندی کے مذاکرات رواں ہفتے دوبارہ شروع ہوں گے۔

ادھر قطر نے کہا ہے کہ وہ بھی حماس کو غزہ میں جنگ بندی کے لیے اسرائیل کے ساتھ امن مذاکرات میں شریک ہونے کے لیے قائل کرنے کی کوشش کر رہا ہے۔