دوسرے ممالک کو پاکستان کے اندرونی معاملات پر بیان دینے کا کوئی حق نہیں، دفتر خارجہ

اسلام آباد :  ترجمان دفتر خارجہ نے غیر ملکی حکومتوں کو پاکستان  کے اندرونی معاملات میں مداخلت پر متنبہ کردیا۔

دفتر خارجہ کی ترجمان ممتاز زہرا بلوچ نے ہفتہ وار بریفنگ میں کہا کہ دیگر ممالک کو پاکستان کے اندرونی امور پر بیان دینے کا کوئی حق حاصل نہیں ہے۔

ترجمان نے افغانستان میں دہشت گردی کا مسئلہ بھی اٹھایا اور کہا کہ پاکستان نے بارہا افغانستان کے حکام سے اس مسئلے کو اٹھایا ہے اور ان سے مطالبہ کیا ہے کہ وہ اپنے علاقے میں موجود دہشت گرد گروہوں کے خلاف کارروائی کریں تاکہ پاکستان میں دہشت گردی کے واقعات میں کمی آ سکے۔

دفتر خارجہ کی ترجمان نے منکی پاکس کے حوالے سے کہا کہ وزارت صحت ہی اس حوالے پر کوئی باقاعدہ بیان جاری کر سکتی ہے۔ اس کے علاوہ ترجمان نے قومی اسمبلی اور سینیٹ سیکرٹریٹ کے لیے ویزا گائیڈ لائنز میں تبدیلی کا بھی اعلان کیا اور کہا کہ اس اقدام کا مقصد ویزا پالیسی کے غلط استعمال کو روکنا ہے۔

بھارت میں تابکاری مواد کی غیر قانونی چوری کے واقعے پر ردعمل دیتے ہوئے ترجمان نے کہا کہ پاکستان اس معاملے پر اپنا ردعمل جاری کرے گا۔

ممتاز زہرا بلوچ کا کہنا تھا کہا ایران کو اپنا دفاع کرنے کا بھر پور حق حاصل ہے، اسرائیل کا اس طرح کی کارروائیوں پر احتساب کرنا چاہیے۔

ترجمان دفتر خارجہ نے کہا کہ اسرائیل کے غزہ میں انسانیت سوز مظالم جاری ہیں، غزہ میں اب تک 40ہزار معصوم شہریوں کو جاں بحق کیا جاچکا ہے، پاکستان غزہ میں جاری اسرائیلی مظالم کی مذمت کرتا ہے،اسرائیل کو غزہ میں نسل کشی پر جوابدہ بنایا جانا چاہیے۔