غزہ صورتحال، پوپ فرانسس نے بھی اسرائیل کو دہشتگرد ملک قرار دیدیا

ویٹی کن سٹی: پوپ فرانسس نے غزہ کی موجودہ صورتحال پر شدید ردِ عمل ظاہر کرتے ہوئے اسرائیل کو دہشت گرد ملک قرار دے دیا ہے۔ ان کا کہنا ہے کہ غزہ میں جاری بمباری اور گولیاں چلانے کی کارروائیاں کسی بھی قسم کے جواز کے بغیر نہتے شہریوں کے خلاف ہیں۔

غیر ملکی خبر رساں ادارے کےمطابق پوپ فرانسس نے اپنے بیان میں بتایا کہ غزہ سے مسلسل تکلیف دہ خبریں موصول ہو رہی ہیں۔ انہوں نے اسرائیلی فورسز کی جانب سے ایک ماں اور بیٹی کو ریسٹ روم جاتے ہوئے گولی مارنے کے واقعے کی مثال دی، جسے انہوں نے "صریح دہشت گردی" قرار دیا۔

پوپ نے عالمی برادری سے مطالبہ کیا کہ وہ اس معاملے میں فعال کردار ادا کرے تاکہ غزہ میں انسانیت سوز واقعات کی روک تھام ہو سکے اور اسرائیل کی جارحیت کو روکا جا سکے۔ انہوں نے عالمی رہنماوں سے اپیل کی کہ وہ امن کے قیام کے لیے اقدامات کریں اور انسانی حقوق کے تحفظ کے لیے اپنا کردار ادا کریں۔

یہ بیان ایسے وقت میں سامنے آیا ہے جب غزہ میں انسانی بحران شدت اختیار کر چکا ہے اور بین الاقوامی تنظیمیں اور انسانی حقوق کے ادارے اس صورتحال پر تشویش کا اظہار کر رہے ہیں۔ عالمی برادری کی جانب سے اس تنازعے کے حل کے لیے دباؤ بڑھ رہا ہے اور امن مذاکرات کی ضرورت زیادہ شدت سے محسوس کی جا رہی ہے۔