ملک بھر میں موسلادھار بارشوں کا سلسلہ جاری،نشیبی علاقے زیر آب

لاہور/کراچی/کوئٹہ : ملک بھر میں موسلادھار بارشوں کا سلسلہ جاری ہے جس کی وجہ سے زندگی معمول سے باہر ہو چکی ہے۔ پنجاب، سندھ اور بلوچستان کے مختلف شہروں میں ہونے والی بارشوں سے نشیبی علاقے زیر آب آ گئے ہیںاور رابطہ سڑکیں بند ہو گئی ہیں۔

لاہور میں گلبرگ، ڈیوس روڈ، گڑھی شاہو، چونگی امرسدھو، فتح گڑھ، ہربنس پورہ اور مال روڈ سمیت مختلف علاقوں میں رات گئے ہونے والی بارش کی وجہ سے سڑکیں پانی میں ڈوب گئیں۔ فاروق آباد، وہاڑی، جلال پور پھٹیاں اور کامونکی میں تو بارش کی شدت اتنی زیادہ تھی کہ جل تھل ایک ہو گیا۔

کراچی میں آج اور کل گرج چمک کے ساتھ بارش کا امکان ہے۔ محکمہ موسمیات نے شہر میں 15 سے 30 ملی میٹر بارش کی پیش گوئی کی ہے۔

بلوچستان میں ندی نالوں میں طغیانی سے نشیبی علاقے زیر آب آ گئے ہیں۔ فصلیں اور رابطہ سڑکیں تباہ ہو گئی ہیں۔

اسلام آباد میں بھی برسات ہوئی ہے اور محکمہ موسمیات نے آئندہ 24 گھنٹے میں مزید بارشوں کی پیش گوئی کردی ہے۔

بورے والا شہر اور اسکے مضافات میں موسلا دھار بارش نے جل تھل ایک کر دیا ہے، نشیبی علاقے زیر آب آگئے اور پانی گھروں اور دکانوں میں داخل ہوگیا۔ کالج روڑ، عارف بازار سمیت اہم سڑکیں پانی میں ڈوب گئیں۔ مختلف فیڈرز ٹرپ کرنے سے بجلی کی سپلائی بھی معطل رہی۔

بارشوں کے پیش نظر واپڈا سمیت دیگر اداروں کو الرٹ کر دیا گیا ہے۔

موسمیاتی ماہرین کا کہنا ہے کہ مون سون کی بارشیں معمول سے زیادہ ہیں اور آئندہ چند دنوں میں بھی بارشوں کا سلسلہ جاری رہنے کا امکان ہے۔

حکومت نے متاثرہ علاقوں میں امدادی کام شروع کر دیئے ہیں۔ ریسکیو اہلکار متاثرہ افراد کو محفوظ مقامات پر منتقل کر رہے ہیں۔