اے این ایف کی بڑی کارروائی: 78 کلو سے زائد منشیات برآمد، 9 ملزمان گرفتار

اسلام آباد :پاکستان میں منشیات کے خلاف جنگ میں اے این ایف نے ایک بار پھر بڑی کامیابی حاصل کی ہے۔ ملک کے مختلف شہروں میں کی گئی 8 مختلف کارروائیوں میں اے این ایف نے 78 کلو سے زائد منشیات برآمد کی ہیں جن کی مجموعی مالیت 7,504,000 روپے بتائی جاتی ہے۔ اس کے علاوہ، اے این ایف نے 9 ملزمان کو بھی گرفتار کیا ہے۔

 اسلام آباد ایئرپورٹ پر سعودیہ اور بحرین جانے والے 2 مسافروں سے 2.8 کلو آئس برآمدہوئی، ایم ون اسلام آباد کے قریب دو مختلف کاروائیوں میں 40.8 کلو گرام چرس اور 2.4 کلوگرام افیون برآمد کر کے دو ملزمان کو گرفتارکر لیا۔

 شاہراہ شاہ والی کراچی کے قریب دو ملزمان سے 14.4 کلو گرام چرس برآمدہوئی، لاہور میں ساتو کاٹلہ گاؤں میں موٹر سائیکل سوار سے 8.4 کلو گرام چرس برآمدہوئی، اسلام آباد کے سیکٹر جی 15 میں ملزم سے 6 کلو گرام چرس اور 1.2 کلو گرام افیون برآمدکی گئی۔

 سیالکوٹ میں ملزم سے 2.2 کلو گرام چرس برآمدہوئی، گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔    

گرفتار تمام ملزمان کے خلاف انسداد منشیات ایکٹ کے تحت مقدمات درج کر لیے گئے ہیں اور ان سے تفتیش جاری ہے۔

اے این ایف کا کہنا ہے کہ وہ ملک میں منشیات کے خلاف جنگ جاری رکھے ہوئے ہے۔ اے این ایف کے عہدیداروں کا کہنا ہے کہ وہ منشیات کے اسمگلروں کے خلاف کسی بھی قسم کی رعایت نہیں برتیں گے اور انہیں قانون کے شکنجے میں لائیں گے۔