بنگلہ دیش کیخلاف ٹیسٹ سیریز، فاسٹ بولر عامر جمال باہر

لاہور : پاکستان کرکٹ بورڈ نے بنگلہ دیش کے خلاف ٹیسٹ سیریز سے فاسٹ بولر عامر جمال کو باہر کر دیا ہے۔ بورڈ کے مطابق عامر جمال کمر کی تکلیف سے دوچار ہیں اور ابھی تک مکمل طور پر فٹ نہیں ہو پائے۔ انہیں کاؤنٹی کرکٹ کے دوران یہ تکلیف لاحق ہوئی تھی۔ 

قبل ازیں عامر جمال کو بنگلہ دیش سیریز کے لیے اسکواڈ میں شامل کیا گیا تھا لیکن ان کی شمولیت ان کی فٹنس پر مشروط تھی۔ اب انہیں نیشنل کرکٹ اکیڈمی میں فٹنس پر کام کرنے کے لیے کہا گیا ہے۔ 

واضح رہے کہ اس سے قبل کامران غلام اور ابرار احمد کو بھی ٹیسٹ اسکواڈ سے ریلیز کیا جا چکا ہے۔ پاکستان اور بنگلہ دیش کے درمیان پہلا ٹیسٹ میچ 21 اگست سے شروع ہوگا۔