شہباز شریف سے یو اے ای صدرکی ملاقات:امن، استحکام ،پائیدار ترقی اور دوطرفہ تعاون مضبوط بنانے کے عزم کا اعادہ

اسلام آباد:وزیراعظم محمد شہبازشریف اورمتحدہ عرب امارات کے صدر شیخ محمد بن زاید النہیان مابین ملاقات ہوئی ہے جس میں امن، استحکام اور پائیدار ترقی کے مشترکہ اہداف کے حصول کیلئےقریبی تعاون جاری رکھنے کے عزم کا اعادہ کیا ہے۔

تفصیلات کے مطابق دونوں رہنماؤں کے درمیان اسلام آباد میں ہونیوالی ملاقات میں دوطرفہ تعلقات کے مختلف پہلوؤں کا تفصیلی جائزہ لیا گیا۔ 
ملاقات میں پاکستان اور یواے ای کی قیادت نے مختلف شعبوں میں تعاون پرپیش رفت اورروابط مزید گہرا کرنے کے امکانات کاجائزہ لیا۔

دوران ملاقات دونوں رہنماؤں نے اقتصادی تعاون، سرمایہ کاری، توانائی، بنیادی ڈھانچے کی ترقی، انفارمیشن ٹیکنالوجی اور عوامی روابط میں تعاون بڑھانے کی اہمیت پر زور دیا۔

 وزیراعظم محمد شہبازشریف اورمتحدہ عرب امارات کے صدر شیخ محمد بن زاید النہیان نے دوطرفہ تجارت میں اضافے کی ضرورت پر بھی اتفاق کیا۔

دونوں رہنماؤں نے اہم علاقائی اور بین الاقوامی پیش رفت پر بھی تبادلہ خیال کیا ۔انہوں نے باہمی دلچسپی کے امور پر قریبی رابطہ اور تعاون جاری رکھنے کے عزم کی توثیق کی۔

ماہرین کا کہنا ہے کہ یواے ای کے صدرشیخ محمد بن زاید النہیان کا دورہ پاکستان دونوں ملکوں کےبرادرانہ تعلقات اور اسٹریٹجک شراکت داری کو مزید مستحکم کرنے کیلئے انتہائی اہمیت کا حامل ہے۔