عمران خان کے آکسفورڈ یونیورسٹی کے انتخابات میں بطور چانسلر حصہ لینے پر شدید احتجاج

بانی چیئرمین پی ٹی آئی عمران خان کے آکسفورڈ یونیورسٹی کے چانسلر کے انتخاب میں حصہ لینے پر احتجاج کا سلسلہ جاری ہے

ڈیلی میل کی رپورٹ کے مطابق عمران خان کے چانسلر کا انتخاب لڑنے کے فیصلے کے خلاف آکسفورڈ یونیورسٹی میں سخت اشتعال اور مظاہروں کی اطلاعات سامنے آئی ہیں۔

عمران خان کی جانب سے آکسفورڈ یونیورسٹی کے چانسلر کا انتخاب لڑنے کے لیے درخواست جمع کرنے کے بعد یونیورسٹی انتظامیہ کو شکایات موصول ہونا شروع ہوگئی ہیں۔ ڈیلی میل نے اپنی سرخی میں عمران خان کو Disgraced وزیراعظم کا خطاب دیا ہے۔

آکسفورڈ یونیورسٹی کو عمران خان کے چانسلر کا الیکشن لڑنے کیخلاف غم و غصّے سے بھری ای میلز اور احتجاجی پٹیشن بھی موصول ہونا شروع ہو گئیں۔

ڈیلی میل کے مطابق ان ای میلز میں بانی پی ٹی آئی کو اکسفورڈ یونیورسٹی کے چانسلر کے لیے نامناسب ترین امیدوار قرار دیا گیا ہے۔

برطانوی اخبار کے مطابق پٹیشن میں مؤقف اپنایا گیا ہے کہ کرپشن کیسز میں سزا یافتہ شخص کا آکسفورڈ یونیورسٹی کے چانسلر کا الیکشن لڑنا قابل قبول نہیں، آکسفورڈ یونیورسٹی کی انسانیت کے احترام، اخلاقی اقدار اور لیڈر شپ کے اعلیٰ معیار کے حوالے سے قابل قدر تاریخ ہے۔عمران خان کا چانسلر کا الیکشن لڑنا اسے داغدار کر دے گا۔

اخبار نے دعویٰ کیا کہ موصول ہونے والی بعض شکایات میں بانی پی ٹی آئی پر طالبان اور اسامہ بن لادن کی پرجوش حمایت کاالزام عائد کرتے ہوئے انہیں شدت پسند قرار دیا گیا ہے۔بانی پی ٹی آئی کے خلاف یونیورسٹی کو موصول پٹیشن میں اس طرح کے مزید ذاتی اور پبلک مفادات سے متصادم باتوں کا بھی ذکر کیا گیا ہے۔

بانی پی ٹی آئی کی نجی زندگی پر بھی کئی داغ موجود ہیں، رپورٹ کے مطابق خواتین کے مختصر لباس کو ان کا ریپ کرنے والے مردوں کے گھناؤنے جرم کی سنگینی کم کرنے والا بیان بھی عمران خان کے گلے پڑگیا۔ یاد رہے کہ عمران خان نے ماضی میں بیان دیا تھا کہ خواتین کا مختصر لباس ان کی آبرو ریزی کے واقعات کی بڑی وجہ ہے، ایسے لباس کے اثرات صرف روبوٹس پر نہیں ہوتے۔

رپورٹ میں یہ بھی کہا گیا ہے کہ عمران خان کے سپورٹرز ان کے امیدوار بننے کے مخالفین کو ہراساں کر رہے ہیں، عمران خان کے حامی اس پر تنقید کو روکنے کیلئے سوشل میڈیا گردی سے بھی کام لے رہے ہیں۔

واضح رہے کہ چند روز قبل عمران خان نے آکسفورڈ یونیورسٹی کے چانسلر کے انتخاب لڑنے کے لیے درخواست جمع کرائی تھی، اس حوالے سے پاکستان تحریک انصاف کے رہنما زلفی بخاری کا ایکس پوسٹ میں کہنا تھا کہ عمران خان کی ہدایت پر آکسفورڈ یونیورسٹی کے چانسلر کے انتخاب 2024 کے لیے درخواست جمع کرادی ہے۔