ضلعی امن کمیٹیوں کی ازسرنو تشکیل، مریم نواز نے منظوری دیدی

لاہور : وزیراعلیٰ پنجاب مریم نواز نے صوبے بھر میں امن و امان کی صورتحال کو بہتر بنانے کے لیے ضلعی امن کمیٹیوں کی ازسرنو تشکیل کی منظوری دے دی ہے۔ 

محکمہ داخلہ پنجاب نے اس حوالے سے تمام اضلاع کے ڈپٹی کمشنرز کو ہدایت کی ہے کہ وہ دو ہفتوں کے اندر اندر نئی امن کمیٹیوں کا نوٹیفکیشن جاری کریں۔

نئی امن کمیٹیوں میں تمام مسالک سے نمائندگی شامل کی جائے گی۔ اس سے قبل 2018 میں ضلعی امن کمیٹیاں تشکیل دی گئی تھیں لیکن وقت کے ساتھ ساتھ ان کے بیشتر ارکان یا تو انتقال کر گئے تھے یا پھر غیر فعال ہو چکے تھے۔

مراسلے کے مطابق نئی ضلعی امن کمیٹیوں میں ممبران اسمبلی، میئر، چیئرمین میونسپل کمیٹی، ڈی پی او، سپیشل برانچ، سی ٹی ڈی عہدیداران اور تمام مسلک کے نمائندگان شامل ہوں گے۔ تمام ممبران کی متعلقہ ڈسٹرکٹ انٹیلیجنس کمیٹی سے کلیئرنس لینا ضروری ہوگا۔

وزیراعلیٰ پنجاب کا کہنا ہے کہ امن و امان کی بحالی ہماری اولین ترجیح ہے۔ نئی ضلعی امن کمیٹیاں صوبے میں امن و امان کی صورتحال کو بہتر بنانے میں کلیدی کردار ادا کریں گی۔