ڈاکٹر عثمان انور کی جگہ راؤ عبدالکریم نئے آئی جی پنجاب تعینات،نوٹیفکیشن جاری

لاہور: راؤعبدالکریم کوڈاکٹرعثمان انور کی جگہ نیا آئی جی پنجاب تعینات کردیا گیا جس کا نوٹیفکیشن بھی جاری ہوگیا۔

تفصیلات کے مطابق کیپٹن ریٹائرڈ عثمان انور ڈی جی ایف آئی اے تعینات کردئیے گئے ، ڈی جی ایف آئی اے رفعت مختار کو اسٹیبلشمنٹ ڈویژن رپورٹ کرنے کی ہدایت کی گئی ہے۔

راؤ عبدالکریم کا تعلق 24 ویں کامن سے ہے، وہ ایڈیشنل آئی جی اسپیشل برانچ تعینات تھے۔ ڈاکٹر عثمان انور کو 24 جنوری 2023ء کو عہدے پر تعینات کیا گیا تھا، انہوں نے بطور آئی جی پنجاب 3 سال سے زائد کا دورانیہ گزارا۔

خیال رہے کہ گزشتہ شب پنجاب حکومت نے آئی جی پنجاب کیلئے 3نام وفاق کو بھجوائے تھے جن میں وسیم سیال، بلال کمیانہ اور راؤ عبدالکریم کے نام شامل تھے۔

دوسری جانب وفاقی وزیر داخلہ محسن نقوی نے عثمان انور کو ڈی جی ،ایف آئی اے کی ذمہ داری سنبھالنے پر مبارکباد پیش کی ہے، انہوں نے نیک تمناؤں کا اظہار کرتے ہوئے کہا کہ عثمان انور کی قیادت نے پنجاب پولیس کو جدید اور پیشہ ور ادارہ بنایا۔

محسن نقوی نےمزید کہا کہ ڈی جی ایف آئی اے کے طور پر عثمان انور کیساتھ نئے دور کا آغاز ہوگا،عثمان انور کی قیادت سے ایف آئی اے میں نمایاں تبدیلی متوقع ہے ،عوام آئندہ مہینوں میں ایف آئی اے میں عملی اور واضح اصلاحات دیکھیں گے۔