ملک میں بڑھتی مہنگائی کے ذمہ دار عمران خان ہیں، نواز شریف

لاہور : مسلم لیگ (ن) کے صدر اور سابق وزیراعظم نواز شریف نے کہا ہے کہ ملک میں بڑھتی مہنگائی کے ذمہ دار عمران خان ہیں۔ ملک کی ترقی میں رکاوٹیں ڈالنے والوں کو برداشت نہیں کیا جائے گا، پی ٹی آئی کی ناقص پالیسیوں کی وجہ سے ملک مہنگائی کے دلدل میں پھنسا ہوا ہے۔ن لیگ ہی عوام کو مہنگائی اور بھاری بلوں کے بوجھ سے نجات دلائے گی۔

ماڈل ٹاؤن میں ہونے والے اجلاس سے خطاب کرتے ہوئے نواز شریف نے کہا کہ گھریلو صارفین کے بعد اب صنعتی صارفین کو بھی ریلیف دینے کی کوشش کی جا رہی ہے۔ ان کا کہنا تھا کہ معیشت کو مضبوط کرنا ہماری اولین ترجیح ہے۔

نواز شریف نے مزید کہا کہ ملک کی ترقی میں رکاوٹیں ڈالنے والوں کو برداشت نہیں کیا جائے گا۔ انہوں نے کہا کہ پی ٹی آئی کی ناقص پالیسیوں کی وجہ سے ملک مہنگائی کے دلدل میں پھنسا ہوا ہے۔

اس سے قبل نواز شریف کی زیرصدارت ایک اہم اجلاس ہوا جس میں ملکی سیاسی صورتحال اور معاشی چیلنجز پر بات چیت کی گئی۔ اجلاس میں وزیراعظم شہباز شریف، وزیراعلیٰ پنجاب مریم نواز، اور پارٹی کے دیگر اہم رہنماؤں نے شرکت کی۔

اجلاس میں نئی حکومتی معاشی پالیسی پر بریفنگ دی گئی اور بجلی کے صارفین کو ریلیف دینے کے حوالے سے بھی بات چیت کی گئی۔ علاوہ ازیں، پنجاب میں نئے بلدیاتی نظام کے حوالے سے بھی بریفنگ دی گئی۔