ڈپٹی چیئرمین پلاننگ کمیشن کا استعفیٰ منظور، نوٹیفکیشن جاری 

اسلام آباد: پلاننگ کمیشن میں بڑی تبدیلیسامنے آئی ہے۔ ڈاکٹر محمد جہانزیب خان کاڈپٹی چیئرمین کے عہدے سے استعفیٰ منظور کر لیا گیا ہے،جس کا نوٹیفکیشن جاری کردیا گیا۔

نوٹیفکیشن کے مطابق وزیرمنصوبہ بندی احسن اقبال کو ڈپٹی چیئرمین پلاننگ کمیشن کا اضافی چارج تفویض کر دیا گیا۔

ساجد محمود کو جوائنٹ سیکرٹری (سی پی 2) اسٹیبلشمنٹ ڈویژن تعینات کر دیا گیا ہے،اسٹیبلشمنٹ ڈویژن نے احکامات کے باضابطہ نوٹیفکیشن جاری کر دیئے۔

 ذرائع کے مطابق وفاقی وزیر احسن اقبال اور ڈاکٹر جہانزیب کے درمیان پلاننگ کمیشن میں اختیارات کے حوالے سے شدید اختلافات پیدا ہوگئے تھے۔

احسن اقبال کا موقف ہے کہ پلاننگ کمیشن میں ڈپٹی چیئرمین کے پاس تمام اختیارات ہوتے ہیں اور انہیں ترقیاتی بجٹ کو حتمی شکل دینے میں نظر انداز کیا جا رہا تھا۔ انہوں نے وزیراعظم سے متعدد بار اپنی ناراضی کا اظہار کیا تھا۔

دوسری جانب ڈاکٹر جہانزیب کا کہنا ہے کہ وہ ضرورت کے مطابق ترقیاتی پروگرام ترتیب دینے کے خواہش مند تھے اور ان کے پاس اس حوالے سے کافی تجربہ ہے۔ انہوں نے کہا کہ پلاننگ کمیشن میں ایک سے زیادہ وزراء ہونے سے کام کرنے میں دشواری ہوتی ہے۔

واضح رہے کہ مسلم لیگ کے دور میں بھی احسن اقبال کو وزیر اور ڈپٹی چیئرمین کا عہدہ دیا گیا تھا۔

یاد رہے کہ گزشتہ روز ڈاکٹر محمد جہانزیب خان ڈپٹی چیئرمین پلاننگ کمیشن کےعہدے سے مستعفی ہوگئے تھے۔