رحیم یار خان: این اے 171 میں ضمنی الیکشن کیلئے پولنگ جاری

رحیم یار خان: قومی اسمبلی کے حلقہ این اے 171 رحیم یار خان میں ضمنی الیکشن کے لئے پولنگ کا عمل جاری ہے۔

ضمنی الیکشن میں پیپلزپارٹی کے مخدوم طاہر رشید الدین اور پی ٹی آئی کے حسان مصطفیٰ کے درمیاں سخت مقابلہ متوقع ہے، جبکہ 4 دیگر آزاد امیدوار بھی حصہ لے رہے ہیں۔

الیکشن کمیشن کے مطابق پولنگ صبح 8 سے شام 5 بجے تک بغیر کسی وقفے کے جاری رہے گی۔حلقے میں رجسٹرڈ ووٹرز کی تعداد 5 لاکھ 26 ہزار 973 ہے، انتخاب کیلئے حلقے میں 301 پولنگ سٹیشن قائم کئے گئے ہیں جہاں سکیورٹی کے سخت انتظامات کئے گئے ہیں، ووٹرز اپنا حق رائے دہی استعمال کریں گے۔

انتخابی حلقہ کی سکیورٹی 4 سیکٹرز اور 23 سب سیکٹرز میں تقیسم کی گئی ہے، ضمنی الیکشن میں 2700 پولیس آفیسرز اور اہلکار تعینات ہیں۔

ضمنی الیکشن کیلئے سی سی ٹی وی کیمرے بھی نصب کئے گئے جبکہ حلقہ کے 62 پولنگ سٹیشنز کو حساس قرار دیا گیا ہے، پولنگ سٹیشنز پر ایلیٹ فورس، کیو آر ایف کے دستے بھی تعینات کئے گئے ہیں۔

یاد رہے کہ پاکستان تحریک انصاف (پی ٹی آئی ) کے رکن قومی اسمبلی ممتاز مصطفیٰ کے انتقال پر یہ نشست خالی ہوئی تھی۔